தங்க மோதிரம் கொள்முதலுக்காக மருத்துவக் கழக விதிகளில் மாற்றம் : அமைச்சா் கே.ஜி.அருண்ராஜ்

‘தாய்மாமன் தங்க மோதிரம்’ திட்டத்துக்கு தங்கம் கொள்முதல் செய்வதற்கு ஏதுவாக தமிழ்நாடு மருத்துவப் பணிகள் கழகத்தின் (டிஎன்எம்எஸ்சி) விதிகள், தேவைப்பட்டால் மாற்றியமைக்கப்படும் என மக்கள் நல்வாழ்வுத் துறை அமைச்சா் கே.ஜி.அருண்ராஜ் தெரிவித்தாா்.

பேரவையில் வெள்ளிக்கிழமை நடைபெற்ற மின்சாரம், சட்டம், இந்து சமய அறநிலையத் துறை மானியக் கோரிக்கை மீதான விவாதத்தின் கீழ் பேசிய திமுக உறுப்பினா் மனோஜ் பாண்டியன், ‘டிஎன்எம்எஸ்சி என்பது மருந்து மற்றும் மருத்துவ உபகரணங்கள் கொள்முதல் செய்யும் அமைப்பு; அதன் கீழ் தங்கம் வாங்குவது எப்படிச் சரியான நடவடிக்கையாக இருக்கும்?’ எனக் கேள்வி எழுப்பினாா்.

அதற்கு அமைச்சா் அருண்ராஜ் அளித்த பதில்:

கடந்த திமுக, அதிமுக ஆட்சிக் காலத்திலிருந்தே பச்சிளங்குழந்தைகளுக்கான பெட்டகம் வழங்கப்பட்டு வருகிறது. அதில், ஹாா்லிக்ஸ் புட்டி, விளையாட்டுப் பொருள்கள், பேரிச்சம்பழம் போன்ற மருந்து சாரா பொருள்களும் உள்ளன. அவற்றை டிஎன்எம்எஸ்சி மூலம்தான் கொள்முதல் செய்து வழங்குகிறோம்.

அதன் அடிப்படையில், தங்கமும் கொள்முதல் செய்யப்படும். அரசு மருத்துவமனைகளில் பிரசவத்தை ஊக்குவிக்கவே இந்தத் திட்டம் செயல்படுத்தப்படுகிறது. தேவைப்பட்டால் அதற்கேற்ப மருத்துவக் கழக விதிகளில் மாற்றம் செய்யப்படும் என்றாா்.