சட்டப்பேரவையா, சண்டைப் பேரவையா? பிரேமலதா விமா்சனம்: ஆதவ் அா்ஜுனா பதில்

அமைச்சா் ஆதவ் அா்ஜுனா பேசினால்தான் பேரவையில் சச்சரவு ஏற்படுவதாக தேமுதிக உறுப்பினரும், அந்தக் கட்சியின் பொதுச் செயலருமான பிரேமலதா விஜயகாந்த் தெரிவித்தாா். இதற்குப் பதிலளித்த ஆதவ் அா்ஜுனா, போலி பிரசாரத்தை முன்வைத்தால் அதற்கு விளக்கமளிக்க வேண்டியுள்ளது என்றாா்.

பேரவையில் பேசிய பிரேமலதா, ‘சட்டப்பேரவையில் மானியக் கோரிக்கையைத் தவிா்த்து அனைத்து விஷயங்களும் நடைபெறுகின்றன; ஒருவருக்கொருவா் தனிப்பட்ட முறையில் குற்றம்சாட்டிக் கொள்வதால் மக்களுக்கு என்ன பயன்? இது சட்டப்பேரவையா? சண்டைப் பேரவையா? பொதுப் பணித் துறை அமைச்சா் ஆதவ் அா்ஜுனா பேசாத வரையில், அவை நடவடிக்கைகள் அமைதியாகப் போகின்றன. அவா் பேசினால் சண்டை ஏற்படுகிறது. அவருக்கு வாய்ப்பளிக்காதீா்கள்’ என்றாா்.

அதைத் தொடா்ந்து நடைபெற்ற விவாதம்:

அமைச்சா் ஆதவ் அா்ஜுனா: இதே பேரவையில் மறைந்த விஜயகாந்த் எப்படி குரல் கொடுத்தாா் என்பது அனைவருக்கும் தெரியும். உண்மைக்குப் புறம்பான குற்றச்சாட்டு முன்வைக்கும்போது மட்டுமே நாங்கள் பேசுகிறோம். நல்ல கருத்துகள் கூறினால் ஏற்றுக் கொள்கிறோம். போலி பிரசாரத்தை முன்வைத்தால் அதற்கு விளக்கமளிக்க வேண்டியுள்ளது.

அமைச்சா் நிா்மல் குமாா்: மறைந்த விஜயகாந்த், பேரவையில் நோ்மையாகவும், பொறுமையாகவும் நடந்துகொள்ளக் கூடியவா். அவரை ஒரு விஷயத்தில் வேண்டுமென்றே சீண்டியதால் அவா் எப்படி கோபம் கொண்டாா் என்பது அனைவருக்கும் தெரியும். அதுபோலவே, எங்களைத் தூண்டுவதால்தான் அதற்குப் பதிலளிக்க வேண்டிய கட்டாயத்தில் உள்ளோம்.

எடப்பாடி பழனிசாமி (அதிமுக): ஆக்கபூா்வமாக எந்த விவாதமும் நடைபெறுவதாகத் தெரியவில்லை. மாறாக காரசாரமாக மட்டுமே நடந்து கொண்டிருக்கிறது. 10 மணி நேரம் பேரவை நடைபெற்றது எனக் கூறுகிறீா்கள். ஆனால், அதில் எத்தனை மணி நேரம் பயனுள்ள வகையில் இருந்தது என்பதைக் கூற வேண்டும். நேரத்தை விரயமாக்கும் எந்த விஷயத்தையும் பேச எவருக்கும் அனுமதிக்க வேண்டாம் என்றாா்.