உயர்கல்வி நிறுவனங்களில் அரசுப் பள்ளி மாணவர் சேர்க்கை அதிகரிப்பு! அன்பில் மகேஸ் பெருமிதம்

முந்தைய திமுக அரசின் திட்டத்தால், நடப்பு கல்வியாண்டில் முதன்மை உயர்கல்வி நிறுவனங்களில் சேரும் அரசுப் பள்ளி மாணவர்களின் எண்ணிக்கை அதிகரித்திருப்பது மகிழ்ச்சியளிப்பதாக பள்ளிக்கல்வித் துறை முன்னாள் அமைச்சர் அன்பில் மகேஸ் கூறியுள்ளார்.

அதன்படி தமிழக அரசுப் பள்ளிகளில் பயின்ற மாணவர்கள், நாட்டின் ஐஐடி, என்ஐடி, ஐஐஎம் போன்ற முதன்மை உயர் கல்வி நிறுவனங்களில் இந்தாண்டு 1,320 பேர் சேர்ந்துள்ளனர். கடந்த ஆண்டு இது 901 ஆக இருந்தது. 2022 முதல் முதன்மை உயர் கல்வி நிறுவனங்களில் அரசுப் பள்ளி மாணவர்களின் எண்ணிக்கை அதிகரித்து வருகிறது.

இதுபற்றி அன்பில் மகேஸ் தனது எக்ஸ் பக்கத்தில்,

"திராவிட மாடல் ஆட்சியில் திமுக தலைவர் ஸ்டாலினின் தொலைநோக்குப் பார்வையால் உருவாக்கப்பட்ட திட்டங்களில் 'மாவட்டத்திற்கு ஒரு அரசு மாதிரிப்பள்ளி' திட்டமும் ஒன்று.

தலைவரின் மனதிற்கு மிகவும் நெருக்கமான திட்டங்களில் இதுவும் முக்கியமானது. நாட்டின் முதன்மை உயர்கல்வி நிறுவனங்களில் தமிழ்நாட்டின் அரசுப்பள்ளி மாணவச் செல்வங்களும் அதிக அளவில் சேர்ந்து பயில வாய்ப்பை ஏற்படுத்தும் வகையில் உருவாக்கப்பட்ட இத்திட்டம் சிறப்பான தாக்கத்தை முந்தைய கல்வியாண்டுகளில் ஏற்படுத்தியுள்ளது.

அதன் தொடர்ச்சியாக, நடப்பு கல்வியாண்டில் முதன்மை உயர்கல்வி நிறுவனங்களில் சேரும் மாணவர்களின் எண்ணிக்கையும் 1,320 என்ற அளவில் உயர்ந்து இருப்பதை அறிந்து மிகமிக மகிழ்ச்சி அடைகிறோம். இந்த நிலை என்றென்றும் தொடர வேண்டும்!" என்று பதிவிட்டுள்ளார்.