திருவள்ளூா் மாவட்ட அளவிலான கலைத் திருவிழா போட்டிகளில் 1.85 லட்சம் மாணவா்கள் பங்கேற்பு

திருவள்ளூா் மாவட்ட ஒருங்கிணைந்த பள்ளிக்கல்வித் துறை சாா்பில் ‘இளையோா் திறன்’ என்ற தலைப்பில் நடத்தப்பட்ட மாவட்ட அளவிலான கலைத் திருவிழா போட்டியில் மாணவ, மாணவிகள் 1.85 லட்சம் பங்கேற்க இருப்பதாக ஆட்சியா் ச.கவிதா தெரிவித்தாா்.

திருவள்ளூா் மாவட்ட ஒருங்கிணைந்த பள்ளிக் கல்வித்துறை சாா்பில் டி.ஆா்.பி.சி.சி மேல்நிலைப்பள்ளி வளாகத்தில் மாவட்ட அளவிலான கலைத்திருவிழா போட்டிகள் சனிக்கிழமை நடைபெற்றது. இப்போட்டிக்கு ஆட்சியா் ச.கவிதா தலைமை வகித்து குத்துவிளக்கேற்றி வைத்து கலை நிகழ்ச்சியை தொடங்கி வைத்து பாா்வையிட்டாா். அதைத் தொடா்ந்து சிறப்பாக நடனம் மூலம் தனித்திறனை வெளிப்படுத்திய மாணவிகளுக்கு பரிசுகளையும் வழங்கினாா்.

பின்னா் இதுகுறித்து அவா் பேசியதாவது: 2026-27-ஆம் ஆண்டுக்கான கலைத்திருவிழாப் போட்டிகள் ‘இளையோா் திறன்’ என்ற மையக்கருத்தின் அடிப்படையில் பள்ளி, வட்டாரம், மாவட்டம் மற்றும் மாநில அளவில் 5 பிரிவுகளில் 106 போட்டிகள் நடைபெற உள்ளது. இதில், அரசு பள்ளிகள்-1,66,727, அரசு உதவி பெறும் பள்ளிகள்-18,455 என மொத்தம் 1.85 லட்சம் போ் பங்கேற்க உள்ளனா்.

இதில் அரசு பள்ளி மாணவா்களுக்கும், அரசு உதவிபெறும் பள்ளி மாணவா்களுக்கும் தனித்தனியாக நடத்தப்பட உள்ளது. கலைத் திருவிழா என்பது பள்ளி மாணவா்களின் கலைத்திறன்களையும், படைப்பாற்றலையும் வெளிக்கொண்டு வந்து ஊக்குவிக்கும் ஒரு சிறப்பான நிகழ்வாகும். இந்த நிகழ்வில் பாட்டு, நடனம், ஓவியம் வரைதல், இசைக்கருவி வாசித்தல், நாடகம், கதை சொல்லுதல், நாட்டுப்புறக் கலைகள் உள்ளிட்ட பல்வேறு போட்டிகள் மாணவா்கள் தங்களது தனித் திறமைகளை வெளிக் கொண்டு வரும் நோக்கமாக கொண்டு நடத்தப்பட்டு வருகிறது.

இதன் மூலம் மாணவா்களின் தன்னம்பிக்கை, படைப்பாற்றல், பேச்சுத்திறன், குழு உணா்வு மற்றும் தலைமைப் பண்பு ஆகியவற்றை மேம்படுத்தவும் உதவுகிறது. மேலும், நமது பாரம்பரிய கலைகள் மற்றும் பண்பாட்டை மாணவா்கள் அறிந்து கொண்டு பாதுகாக்கவும், சிறந்த வாய்ப்பாக அமைகிறது.

முதல் 3 பிரிவில் உள்ள 1 முதல் 8-ஆம் வகுப்பு மாணவா்களுக்கு அக்டோபா் மாதம் நடத்தப்பட உள்ளது. மேலும், பிரிவு 9 மற்றும் 10-ஆம் வகுப்பு மாணவா்களுக்கு போட்டிகளின் எண்ணிக்கை-32, அரசுப் பள்ளிகள்-584, அரசு உதவி பெறும் பள்ளிகள்-198 என மொத்தம்- 782 பள்ளிகள் பங்கேற்கின்றன. அதேபோல், 11 மற்றும் 12-ஆம் வகுப்பு, போட்டிகளின் எண்ணிக்கை-32, அரசுப் பள்ளிகள்-416, அரசு உதவி பெறும் பள்ளிகள்-150, மொத்தம்-566 பள்ளிகள் பங்கேற்பதாகவும் அவா் தெரிவித்தாா்.

இதில், மாவட்டக் கல்வி அலுவலா் (இடைநிலை) பி.அமுதா, மாவட்ட தொடக்கக் கல்வி அலுவலா் (பொன்னேரி) மு.பன்னீா்செல்வம், உதவி திட்ட அலுவலா் (ஒருங்கிணைந்த பள்ளிக் கல்வி) கோ.பரமேஸ்வரி, டி.ஆா்.பி.சி.சி. பள்ளித் தலைமையாசிரியா் ராம்மோகன், வட்டாட்சியா் சரண்யா, தமிழ்நாடு அரசு ஊழியா்கள் ஆசிரியா்கள் நல கூட்டமைப்பின் மாநிலத் தலைவா் சா.அருணன, தமிழ்நாடு முதுகலை ஆசிரியா் கழக மாநிலத் தலைவா் செ.பிரபாகரன் மற்றும் ஆசிரியா்கள் உள்பட பள்ளி, மாணவ, மாணவிகள் கலந்து கொண்டனா்.