வர்த்தக வாகன விற்பனை 25% உயரும்: டாடா மோட்டார்ஸ்

நடப்பு நிதி ஆண்டில் வர்த்தக வாகனங்கள் விற்பனை 25 சதவீதம் வளர்ச்சி காணும் என்று டாடா மோட்டார்ஸ் நம்பிக்கை தெரிவித்தது.
 இதுகுறித்து அந்நிறுவனத்தின் செயல் இயக்குநர் ரவி பிஷாரடி (வர்த்தக வாகனப் பிரிவு) கூறியதாவது:
 நடப்பு நிதி ஆண்டில் டாடா வர்த்தக வாகனங்கள் விற்பனை 25 சதவீத வளர்ச்சி காணும்.
 நடப்பு காலாண்டில் முதல் இருமாதங்களில் வர்த்தக வாகன விற்பனை சூடுபிடித்துள்ளது. மார்ச் மாதத்தில் விற்பனை மேலும் சிறப்பாக இருக்கும்.
 அடுத்த நிதி ஆண்டிலும் இதே நிலை தொடரும். எனினும், நடப்பு நிதி ஆண்டுடன் ஒப்பிடும் போது அடுத்த நிதி ஆண்டில் விற்பனை வளர்ச்சி சற்று குறைவாகவே இருக்கும். குறிப்பாக, முதல் அரையாண்டை விட, இரண்டாவது அரையாண்டு காலத்தில் வாகன விற்பனை சிறப்பானதாக இருக்கும்.
 2017 ஏப்ரல் முதல் பிஎஸ்-ஐய வாகனத் தரக்கட்டுப்பாட்டு விதிமுறைகள் நடைமுறைக்கு வரவுள்ளதையடுத்து, வாகன விற்பனை 10-15 சதவீதம் உயரும்.
 25 ஹைபிரிட் பஸ்களை வழங்குவதற்காக மும்பை நகராட்சியுடன் ஏற்கெனவே ஒப்பந்தம் மேற்கொள்ளப்பட்டுள்ளது. இதற்கான, இறுதி உத்தரவு கூடிய விரைவில் பெறப்பட உள்ளது என்று ரவி பிஷாரடி தெரிவித்தார்.
 டீசல் மற்றும் மின்சாரத்தில் இயங்கும் வகையில் வடிவமைக்கப்பட்டுள்ள ஹைபிரிட் பஸ்ஸின் விலை (ஆண்டு பராமரிப்பு செலவு உள்பட) ரூ. 2 கோடிக்கும் அதிகம் என்று தகவல்கள் தெரிவிக்கின்றன.