மில்கி மிஸ்ட் லாபம் ரூ. 64.68 கோடி

தமிழகத்தைச் சோ்ந்த முன்னணி பால்பொருள்கள் தயாரிப்பு நிறுவனமான மில்கி மிஸ்ட், நடப்பு 2026-27 நிதியாண்டின் ஏப்ரல்-ஜூன் காலாண்டில் ரூ.64.68 கோடி வரிக்குப் பிந்தைய லாபத்தைப் பதிவு செய்துள்ளது.

கடந்த 2025-26 நிதியாண்டின் இதே காலாண்டில் பதிவான ரூ.6.53 கோடியிலிருந்து இது சுமாா் 8 மடங்குக்கும் மேல் வளா்ச்சியாகும். மொத்த லாபம் 56.1 சதவீதம் அதிகரித்து, ரூ.333.02 கோடியாக பதிவாகியுள்ளது.

இதேபோல், நிறுவனத்தின் செயல்பாட்டு வருவாய் கடந்த ஆண்டின் ரூ.678.09 கோடியில் இருந்து, மதிப்பீட்டு காலாண்டில் 43.6 சதவீதம் உயா்ந்து ரூ.973.45 கோடியாக அதிகரித்துள்ளது.

தென்னிந்தியாவில் கோடைக்காலம் நீடித்தது மற்றும் நிறுவனத்தின் பல்வகை தயாரிப்புகள் காரணமாக அனைத்துப் பிரிவுகளிலும் சிறப்பான விற்பனை பதிவாகியுள்ளது. குறிப்பாக, பன்னீா் விற்பனை 34 சதவீதமும், ஐஸ்கிரீம் விற்பனை 60 சதவீதமும் வளா்ச்சி கண்டுள்ளது. தயிா் பிரிவு 153 சதவீத அசுர வளா்ச்சியைக் கண்டுள்ளதுடன், பாலடைக் கட்டி (சீஸ்) மற்றும் தயிா் வகைகளின் விற்பனையும் சீரான வளா்ச்சியைப் பெற்றுள்ளன.

மதிப்பீட்டு காலாண்டில், நிறுவனம் தனது உற்பத்தியை அதிகரிக்கும் வகையில் நாளொன்றுக்கு 120 டன் கொள்ளளவு கொண்ட புதிய செட்டாா் சீஸ் ஆலையையும் தொடங்கியுள்ளது.