கூகுள் குரோமில் விமானம் ஓட்டும் அனுபவம்! பெறுவது எப்படி?

கூகுள் குரோமை பயன்படுத்தி விமானம் ஓட்டும் அனுபவத்தைப் பெறும் வகையிலான மேம்படுத்தப்பட்ட அம்சத்தை கூகுள் அறிமுகம் செய்துள்ளது.

இதுவரை கணினியில் சிறப்பு மென்பொருள்களில் மட்டுமே கிடைத்த விமான இயக்கி வசதியை இனி, கூகுள் எர்த் மூலம் பெறலாம் என கூகுள் தெரிவித்துள்ளது.

இதற்காக எந்தவொரு பிரத்யேக செயலியையும் தரவிறக்கம் செய்யாமல், இணையம் மூலமே earth.google.com என்ற இணைய முகவரியில் சென்று விமானம் இயக்கும் அனுபவத்தை பயனர்களால் பெற முடியும்.

உலகின் அனைத்துப் பகுதிகளையும் 3டி முறையில் படம்பிடித்து தரவுகள் சேர்க்கப்பட்டுள்ள நிலையில், எந்தவொரு பகுதிக்கும் விமானத்தை இயக்கிச் செல்லும் அனுபவத்தைப் பெறலாம்.

இதற்காக கூகுள் எர்த் இணையதளப் பக்கத்தை திறந்து, டூல்ஸ் பகுதியில் உள்ள விமான இயக்கி வசதியை (Flight Simulator) தேர்வு செய்வதன் மூலம் விமானத்தை இயக்கும் அனுபவத்தை பெற முடியும்.

விமான பயிற்சிக்காக இந்த வசதி அறிமுகம் செய்யப்படவில்லை. மாறாக விமானத்தை இயக்கும் அல்லது விமானத்தில் பறக்கும் அனுபவத்தை பயனர்கள் பெற வேண்டும் என்பதற்காக மட்டுமே இந்த வசதியை கூகுள் அறிமுகம் செய்துள்ளது.

இதற்கு முன்பு விசைப்பலகை பொத்தான்களைப் பயன்படுத்தி 2007 டெஸ்க்டாப் வெர்ஷனில்

இந்த அம்சத்தை கூகுள் அறிமுகம் செய்திருந்த நிலையில், தற்போது earth.google.com என்ற இணையதள முகவரியைப் பயன்படுத்தி விமானம் இயக்கும் அனுபவத்தைப் பெறுவதை கூகுள் எளிமையாக்கியுள்ளது குறிப்பிடத்தக்கது.