ஆப்கனில் பயங்கரம்: சிறை மீது தாக்குதல் நடத்தி நூற்றுக்கணக்கான கைதிகளை தப்பவிட்ட தலிபான்

ஆப்கானிஸ்தானின் காஸ்னி பகுதியில் உள்ள சிறைச்சாலை மீது திடீரென தாக்குதல் நடத்திய தலிபான் பயங்கரவாதிகள், சிறையில் அடைக்கப்பட்டிருந்த 350க்கும் மேற்பட்ட கைதிகளை தப்பியோடச் செய்துள்ளனர்.

இன்று அதிகாலை 2 மணியளவில், சிறையின் முக்கிய நுழைவு வாயிலை, வெடிகுண்டுகள் நிரப்பிய காரைக் கொண்டு தலிபான் பயங்கரவாதி மோதியதில், கார் வெடித்துச் சிதறியது.

இந்த குண்டுவெடிப்பு நிகழ்ந்த சில நிமிடங்களில் காவல்துறை உடையில் வந்த 6 பயங்கரவாதிகள், சிறைச்சாலைக்குள் நுழைந்து, சிறைக் கைதிகளை விடுவித்தனர்.

இதில் 352 சிறைக் கைதிகள் தப்பியோடினர். 80க்கும் மேற்பட்டோர் தப்பியோடும் போது பிடிபட்டனர்.

இந்த தாக்குதலில் 4 காவல்தறையினர் பலியாகினர். 10 காவல்துறையினர் மற்றும் 4 சிறைக்கைதிகள் என 14 பேர் காயமடைந்ததாக அந்நாட்டு காவல்துறையினர் தெரிவித்துள்ளனர்.