முதல் முறையாக இஃப்தார் விருந்தளித்தார் டிரம்ப்

முஸ்லிம்களின் புனித மாதமான ரமலானையொட்டி, அமெரிக்க அதிபர் டொனால்ட் டிரம்ப் வெள்ளை மாளிகையில் இஃப்தார் விருந்து அளித்தார்.
அவர் அதிபராகப் பொறுப்பேற்ற பிறகு வெள்ளை மாளிகையில் நடைபெற்ற முதல் இஃப்தார் விருந்து இது என்பது குறிப்பிடத்தக்கது.
தான் பதவியேற்றால் முஸ்லிம் நாடுகளிலிருந்து அமெரிக்காவுக்கு அகதிகள் வருவதைத் தடை செய்வேன் என்று அதிபர் தேர்தல் பிரசாரத்தின்போது டிரம்ப் கூறினார்.
அதன்படி, ஆட்சிப் பொறுப்பை ஏற்ற பிறகும் அதுதொடர்பான சில ஆணைகளைப் பிறப்பித்தார். மேலும், முஸ்லிம்களுக்கு எதிராக கருத்துகளை அவர் கூறி வந்ததாகவும் குற்றம் சாட்டப்படுகிறது.
இந்த நிலையில், கடந்த 1990-களிலிருந்து ரமலான் மாதங்களில் ஆண்டுதோறும் அமெரிக்க அதிபர் மாளிகையில் அளிக்கப்பட்டு வந்த இஃப்தார் விருந்தை, டொனால்ட் டிரம்ப் கடந்த ஆண்டு ரத்து செய்தார்.
இது, அமெரிக்காவில் பெரும் சர்ச்சையை ஏற்படுத்தியது.
இந்தச் சூழலில், அத்தகைய சர்ச்சைகளுக்கு முற்றுப்புள்ளி வைக்கும் வகையில், அதிபர் மாளிகையில் இஃப்தார் விருந்துக்கு டொனால்ட் டிரம்ப் புதன்கிழமை ஏற்பாடு செய்திருந்தார்.
அப்போது வெளியிட்ட அறிக்கையில், அமெரிக்காவின் எதிர்கால வளத்துக்கும், பாதுகாப்புக்கும் முஸ்லிம் சமூகத்தினர் ஒத்துழைப்பு அளிக்க வேண்டும் என்று அவர் கேட்டுக்கொண்டார்.
இந்த விருந்தில் ஐக்கிய அரபு அமீரகம், எகிப்து, துனீசியா, கத்தார், பஹ்ரைன், மொராக்கோ, அல்ஜீரியா, லிபியா, குவைத், காம்பியா, எத்தியோப்பியா, இராக், போஸ்னியோ போன்ற முஸ்லிம் நாடுகளின் தூதகரக அதிகாரிகள் கலந்து கொண்டனர்.