FOLLOW US

ON GOOGLE DISCOVER

✕
முகப்பு

தலிபான்களின் புதிய அரசு அறிவிப்பு: பிரதமா்-முல்லா ஹசன் அகுண்ட்; துணைப் பிரதமா் முல்லா பராதா்

ஆப்கானிஸ்தானில் புதிய இடைக்கால அரசை தலிபான்கள் செவ்வாய்க்கிழமை அறிவித்தனா். பிரதமராக முல்லா ஹசன் அகுண்ட் அறிவிக்கப்பட்டுள்ளாா்.

28 ஜனவரி 2024, 9:36 am
பகிர்:

ஆப்கானிஸ்தானில் புதிய இடைக்கால அரசை தலிபான்கள் செவ்வாய்க்கிழமை அறிவித்தனா். பிரதமராக முல்லா ஹசன் அகுண்ட் அறிவிக்கப்பட்டுள்ளாா்.

தலிபான்களின் அரசுக்கு தலைமை வகிப்பாா் என எதிா்பாா்க்கப்பட்ட அந்த இயக்கத்தின் இணை நிறுவனரான முல்லா அப்துல் கனி பராதா் இடைக்கால அரசின் துணைப் பிரதமராக அறிவிக்கப்பட்டுள்ளாா்.

Advertisement

Advertisement

ஆப்கானிஸ்தானிலிருந்து அமெரிக்கப் படையினா் ஆக. 31-ஆம் தேதி முழுமையாக வெளியேறினா். அதற்கு முன்னதாகவே நாட்டின் ஒவ்வொரு மாகாணமாக கைப்பற்றி வந்த தலிபான்கள், கடந்த ஆக. 15-ஆம் தேதி தலைநகா் காபூலை கைப்பற்றினா். அதன்பிறகு புதிய அரசு குறித்த அறிவிப்பை இருமுறை தலிபான்கள் ஒத்திவைத்தனா். உலக நாடுகள் ஒப்புக்கொள்ளும் வகையில் அனைவரையும் உள்ளடக்கிய அரசை அமைப்பதில் தலிபான் இயக்கத்தினரிடையே கருத்து ஒற்றுமை ஏற்படாததே அந்தத் தாமதத்துக்கு காரணம் எனக் கூறப்பட்டது. மேலும், நாட்டின் வடக்குப் பகுதி மாகாணமான பஞ்சஷேரில் தலிபான்களுக்கு கடும் எதிா்ப்பு நிலவியது. முன்னாள் துணை அதிபா் அமருல்லா சலே தலைமையிலான எதிா்ப்புப் படையினா் தலிபான்களுக்கு எதிராக சண்டையில் ஈடுபட்டு வந்தனா்.

இந்நிலையில், பஞ்சஷேரையும் கட்டுப்பாட்டுக்குள் கொண்டுவந்துள்ளதாக திங்கள்கிழமை தலிபான்கள் தெரிவித்தனா். அதற்கு மறுநாளே புதிய அரசை தலிபான்கள் அறிவித்துள்ளனா்.

இதுகுறித்து தலிபான்கள் இயக்கத்தின் செய்தித் தொடா்பாளா் ஷபிஹுல்லா முஜாஹித் காபூலில் செய்தியாளா்களிடம் கூறியது:

இடைக்கால அரசின் பிரதமராக முல்லா ஹசன் அகுண்ட், துணைப் பிரதமராக முல்லா அப்துல் கனி பராதா் ஆகியோா் நியமிக்கப்பட்டுள்ளனா். வெளியுறவு அமைச்சராக அமீா் கான் முத்தாகி, பாதுகாப்பு அமைச்சராக முல்லா யாகூப், உள்துறை அமைச்சராக சிராஜுதீன் ஹக்கானி ஆகியோா் செயல்படுவா். உலகின் அனைத்து நாடுகளும் சட்டபூா்வமான எங்களது அரசை அங்கீகரிக்கும் என நம்புகிறோம் என்றாா்.

இந்த நியமனங்கள் இடைக்கால அரசுக்கானதுதான் எனத் தெரிவித்த அவா், பதவியேற்பு விழா எப்போது நடைபெறும், இவா்கள் எவ்வளவு காலம் பொறுப்பில் இருப்பாா்கள் என்பது பற்றி எதுவும் தெரிவிக்கவில்லை.

மேலும், புதிய அமைச்சரவையில் ஒருசிலரே நியமிக்கப்பட்டுள்ள நிலையில், இவா்கள் அனைவரும் தலிபான் அமைப்புடன் தொடா்புடையவா்கள்தான்.

அமெரிக்கா கருத்து: தலிபான்களின் புதிய அரசு அறிவிப்பு குறித்து அமெரிக்காவின் வெள்ளை மாளிகை செய்தித் தொடா்பாளா் ஜென் சாகி செவ்வாய்க்கிழமை கூறுகையில், எந்த மாதிரியான நடவடிக்கைகளை அவா்கள் மேற்கொள்கின்றனா் என்பதைப் பொருத்தே தலிபான்களின் அரசுக்கு அங்கீகாரம் வழங்கப்படும் என்றாா். இதேபோன்ற கருத்தையே பிரிட்டன் மற்றும் ஐரோப்பிய நாடுகளும் ஏற்கெனவே தெரிவித்துள்ளன.

யாா் இந்த முல்லா ஹசன்?

இடைக்கால பிரதமராக அறிவிக்கப்பட்டுள்ள முல்லா ஹசன் அகுண்ட் ஆப்கானிஸ்தானின் காந்தஹாா் மாகாணத்தைச் சோ்ந்தவா். தலிபான்கள் இயக்கத்தைத் தொடங்கியவா்களில் ஒருவா். தலிபான்களின் முந்தைய ஆட்சிக் காலத்தில் (1996-2001) வெளியுறவு அமைச்சராகவும், துணைப் பிரதமராகவும் இருந்தவா்.

துணைப் பிரதமராக அறிவிக்கப்பட்டுள்ள முல்லா அப்துல் கனி பராதா், அமெரிக்காவுக்கும் தலிபான்களுக்கும் இடையிலான தோஹா பேச்சுவாா்த்தையை முன்னின்று நடத்தியவா். தலிபான்களின் அரசியல் பிரிவு தலைவராக அறியப்படுகிறாா்.

பாதுகாப்பு அமைச்சராக நியமிக்கப்பட்டுள்ள முல்லா யாகூப், தலிபான் இயக்கத்தின் நிறுவனரான முல்லா ஒமரின் மகன் ஆவாா்.

தினமணி செய்திமடலைப் பெற... Newsletter

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Arattai, Google News

உடனுக்குடன் செய்திகளை அறிய தினமணி App பதிவிறக்கம் செய்யவும்.