செங்கல்வராயர் அறக்கட்டளையின் தலைவராக நீதிபதி எஸ்.ராஜேஸ்வரன் நியமனம்: உயர் நீதிமன்றம் உத்தரவு

செங்கல்வராயர் அறக்கட்டளையின் புதிய தலைவராக ஓய்வு பெற்ற உயர் நீதிமன்ற நீதிபதி எஸ்.ராஜேஸ்வரனை நியமித்து சென்னை உயர் நீதிமன்றம் உத்தரவிட்டது.
 சென்னையில் உள்ள பி.டி.லீ. செங்கல்வராய நாயக்கர் அறக்கட்டளையின் தலைவராக இருந்த உயர் நீதிமன்ற ஓய்வு பெற்ற நீதிபதி ஏ.கே.ராஜன், தனது தலைவர் பதவியை கடந்த ஜனவரி 12-ஆம் தேதி ராஜிநாமா செய்தார்.
 இதையடுத்து, அறக்கட்டளையின் தலைவரை நியமித்து உத்தரவிடக் கோரி, சென்னை உயர் நீதிமன்றத்தில் வழக்கு தொடரப்பட்டது. இந்த வழக்கை விசாரித்த நீதிபதிகள் ஆர்.சுதாகர், எஸ்.வைத்தியநாதன் ஆகியோர், "செங்கல்வராயர் அறக்கட்டளைக்கு புதிய தலைவராக உயர் நீதிமன்ற முன்னாள் நீதிபதி எஸ்.ராஜேஸ்வரனை நியமிக்கிறோம். அறக்கட்டளையின் அனைத்து பொறுப்புகளையும் உடனடியாக அவரிடம் ஒப்படைக்க வேண்டும். நீதிபதி எஸ்.ராஜேஸ்வரன் இந்தப் பதவியில் வரும் 2017-ஆம் ஆண்டு செப்டம்பர் 19-ஆம் தேதி வரை நீடிப்பார்' என உத்தரவிட்டனர்.