ஏழாவது மாடியில் இருந்து விழுந்த 4 வயது சிறுமி சாவு

சென்னை சூளைமேட்டில் ஏழாவது மாடியில் இருந்து கீழே விழுந்து 4 வயது சிறுமி உயிரிழந்தது தொடர்பாக போலீஸார் விசாரணை நடத்தி வருகின்றனர்.
நேபாளத்தைச் சேர்ந்த கோபால், தனியார் நிறுவன ஊழியர். சென்னை சூளைமேடு சித்ரா அவென்யூவில் உள்ள அடுக்குமாடிக் குடியிருப்பில் 7-ஆவது தளத்தில் வசித்து வருகிறார். கீதா என்ற மனைவியும்,  சாரதா (எ) ஈஷா (4),   நரேஷ் (1) ஆகிய இரு குழந்தைகளும் இருந்தனர். 
புதன்கிழமை இரவு தூக்கத்தில் இருந்து எழுந்த சாரதா வீட்டை விட்டு வெளியே வந்து,  பால்கனி தடுப்புச் சுவரில் ஏறியதாக கூறப்படுகிறது.  இதில் கால் இடறி சாரதா 7-ஆவது தளத்தில் இருந்து கீழே விழுந்தாள்.
பலத்த காயமடைந்த சாரதாவை அங்குள்ளவர்கள் மீட்டு,  எழும்பூர் குழந்தைகள் நல அரசு மருத்துவமனையில் சிகிச்சைக்காக அனுமதித்தனர். ஆனால் அங்கு சிறிது நேரத்தில் சிறுமி சாரதா உயிரிழந்தாள்.