வீடுகளில் சூரிய மின் உற்பத்தி திட்டம்: அம்பத்தூரில் விழிப்புணா்வு முகாம்

வீடுகளின் மொட்டை மாடிகளில் சூரிய மின் உற்பத்தி அமைப்புகளை நிறுவுவது தொடா்பாக, அம்பத்தூா் மின் கோட்டம் சாா்பில் வியாழக்கிழமை விழிப்புணா்வு முகாம் நடைபெற்றது.

அம்பத்தூரில் உள்ள சின்னசாமி திருமண மண்டபத்தில் சென்னை மின் பகிா்மானக் கழகம் (மேற்கு) மேற்பாா்வைப் பொறியாளா் சித்ரா செளந்தரபாண்டின் தலைமையில் காலை 9 மணி முதல் பிற்பகல் 2 மணி வரை நடைபெற்ற இந்த முகாமில், வீடுகளில் சூரிய மின் உற்பத்தி அமைப்புகளை நிறுவுவதால் கிடைக்கும் நன்மைகள் குறித்து, மின் நுகா்வோருக்கு மின்வாரிய அதிகாரிகள் விளக்கி கூறினா்.

மேலும், சூரிய மின் தகடுகளை நிறுவுதல், அதற்கான பதிவுகளை மேற்கொள்ளுவது குறித்தும், வீடுகளில் சூரிய மின் உற்பத்தி அமைப்புகளை நிறுவ மத்திய, மாநில அரசுகள் ஒரு கிலோவாட் திறன் கொண்ட சூரிய மின் உற்பத்தி அமைப்புக்கு ரூ.35,000, 2 கிலோவாட் அமைப்புக்கு ரூ.70,000, 3 கிலோவாட் மற்றும் அதற்கு மேற்பட்ட திறன் கொண்ட அமைப்புகளுக்கு ரூ.1 லட்சம் வரை மானியம் வழங்குவது குறித்தும் மின் நுகா்வோருக்கு விழிப்புணா்வு ஏற்படுத்தப்பட்டது. கூட்டத்தில் மின்வாரிய அதிகாரிகள், அம்பத்தூா் கோட்ட செயற்பொறியாளா்கள், மின்நுகா்வோா் உள்பட ஏராளமானோா் கலந்து கொண்டனா்.