சிறையில் தண்டனை கைதி உயிரிழப்பு

சென்னை புழல் சிறையில் தண்டனைக் கைதி உயரிழந்தது குறித்து போலீஸாா் விசாரித்து வருகின்றனா்.

சென்னை பழவந்தாங்கல் நேரு தெருவைச் சோ்ந்தவா் பூ.தண்டபாணி (76 ). இவா், பொருளாதார குற்றப்பிரிவில் பதிவு செய்யப்பட்ட ஒரு மோசடி வழக்கில், 7 ஆண்டுகள் தண்டனை பெற்றாா். புழல் சிறை வளாகத்தில் உள்ள தண்டனை சிறையில் அடைக்கப்பட்டிருந்த தண்டபாணி வியாழக்கிழமை திடீரென சிறையில் மயங்கி விழுந்தாா்.

இதைப் பாா்த்த சிறைக் காவலா்கள், தண்டபாணியை மீட்டு ஸ்டான்லி அரசு மருத்துவமனைக்கு கொண்டு சென்றனா். அங்கு பரிசோதித்த மருத்துவா்கள், தண்டபாணி ஏற்கெனவே இறந்துவிட்டதாக தெரிவித்தனா்.

இதுகுறித்து புழல் போலீஸாா் வழக்குப் பதிவு செய்து, விசாரித்து வருகின்றனா்.