பள்ளமொளச்சூர் பகுதியில் திறக்கப்படாத சமுதாய நலக்கூடம்

பள்ளமொளச்சூர் பகுதியில் ரூ. 30 லட்சம் செலவில் சமுதாய நலக்கூடம் கட்டி முடிக்கப்பட்டும் திறக்கப்படாமல் உள்ளது. இதனை திறந்து பொதுமக்கள் பயன்பாட்டிற்கு கொண்டுவர வேண்டும் என அப்பகுதி பொதுமக்கள் கோரிக்கை வைத்துள்ளனர்.
ஸ்ரீபெரும்புதூர் ஒன்றியம், மொளச்சூர் ஊராட்சியில் சுமார் 5 ஆயிரத்திற்கும் மேற்பட்ட பொதுமக்கள் வசித்து வருகின்றனர். மொளச்சூர் ஊராட்சிக்குட்பட்ட பள்ளமொளச்சூர் பகுதியில் கடந்த 2015-2016ஆம் நிதியாண்டில் சட்டப் பேரவை உறுப்பினர் தொகுதி மேம்பாட்டு நிதியின் மூலம் ரூ.30 லட்சம் மதிப்பீட்டில் சமுதாய நலக்கூடம் கட்டப்பட்டது. 
இக்கட்டடம் கட்டி முடிக்கப்பட்டு ஓராண்டுக்கு மேலாகியும், இன்று வரை திறந்து வைக்காததால் சமுதாய நலக்கூடத்தை பொதுமக்கள் பயன்படுத்த முடியாத நிலை உள்ளது. 
இதுகுறித்து இப்பகுதி மக்கள் கூறுகையில், சமுதாய நலக்கூடம் கட்டிமுடிக்கப்பட்டு ஓராண்டுக்கு மேலாகியும், அதிகாரிகள் திறந்துவைக்காமல் உள்ளனர். 
இதனால் பல ஆயிரம் ரூபாய் செலவு செய்து தனியார் மண்டபங்களில் எங்கள் வீட்டு சுப நிகழ்ச்சிகளை நடத்தி வருகிறோம். இதனால் எங்களுக்கு தேவையில்லாத செலவு ஏற்பட்டு வருகிறது. எனவே கட்டி முடிக்கப்பட்ட சமுதாய நலக்கூடத்தை திறந்துவைக்க அதிகாரிகள் முன்வர வேண்டும்' என்றனர்.