குறைதீர் கூட்டங்கள் ரத்து

சட்டப்பேரவைத் தேர்தல் நடத்தை விதிமுறைகள் நடைமுறைக்கு வந்துள்ளதால், திருவண்ணாமலை மாவட்டத்தில் நடைபெறும் அனைத்து குறைதீர் கூட்டங்களும் ரத்து செய்யப்படுவதாக ஆட்சியர் அ.ஞானசேகரன் தெரிவித்துள்ளார்.

தமிழக சட்டப்பேரவைத் தேர்தல் 2016-க்கான தேர்தல் நடத்தை விதிமுறைகள் வெள்ளிக்கிழமை முதல் நடைமுறைக்கு வந்துள்ளன. எனவே, திருவண்ணாமலை மாவட்ட ஆட்சியர் அலுவலகத்தில் வாரந்தோறும் திங்கள்கிழமைகளில் நடைபெறும் மக்கள் குறைதீர் கூட்டங்கள் மார்ச் 7-ஆம் தேதி முதல் ரத்து செய்யப்படுகிறது.

இதேபோல, மாற்றுத் திறனாளிகளுக்கான குறைதீர் கூட்டங்கள், விவசாயிகள் குறைதீர் கூட்டங்கள், ஓய்வூதியர் குறைதீர் கூட்டங்கள் உள்ளிட்ட அனைத்து வகையான குறைதீர் கூட்டங்களும் அடுத்த அறிவிப்பு வரும் வரையில் ரத்து செய்யப்படுகிறது.

குறைதீர் கூட்டங்கள் மீண்டும் நடைபெறும் தேதி பின்னர் அறிவிக்கப்படும் என்று மாவட்ட ஆட்சியர் அ.ஞானசேகரன் தெரிவித்துள்ளார்.