"திருமுருகன் காந்திக்கு சிறையில் போதிய வசதிகள் இல்லை'

வேலூர் மத்திய சிறையில் அடைக்கப்பட்டுள்ள திருமுருகன் காந்திக்கு சிறைக்குள் போதுமான வசதிகள் செய்துதரப்படவில்லை. அவர் தனிமைப்படுத்தப்பட்டு வருகிறார் என்று மக்கள் கண்காணிப்பகத்தின் நிர்வாக இயக்குநரும், மனித உரிமை செயல்பாட்டாளருமான ஹென்றி திபென் தெரிவித்தார். மே பதினேழு இயக்கத்தின் ஒருங்கிணைப்பாளர் திருமுருகன்காந்தி, கடந்த ஆகஸ்ட் 9-ஆம் தேதி முதல் வேலூர் மத்திய சிறையில் அடைக்கப்பட்டுள்ளார். 
இந்நிலையில், மக்கள் கண்காணிப்பகத்தின் நிர்வாக இயக்குநரும், மனித உரிமை செயல்பாட்டாளருமான ஹென்றி திபென் வேலூர் மத்திய சிறையில் திருமுருகன்காந்தியை புதன்கிழமை சந்தித்துப் பேசினார். பின்னர், சிறையிலிருந்து வெளியே வந்த அவர், செய்தியாளர்களுக்கு அளித்த பேட்டி:
வேலூர்  மத்திய சிறையில் அடைக்கப்பட்டுள்ள திருமுருகன் காந்திக்கு உடல்நலக் குறைவு ஏற்பட்டுள்ளது. சிறையில் அவருக்கு போதிய வசதிகள் செய்து தரப்படவில்லை. 
சிறையில் உள்ள மருத்துவமனைக்குக்கூட செல்ல அனுமதிப்பதில்லை. மற்ற சிறை வாசிகளை சந்திக்கவும் வாய்ப்பளிக்கப்படுவதில்லை. அவரை தொடர்ந்து தனிமைப்படுத்தி வருகின்றனர். இவ்வாறு சிறையில் திருமுருகன் காந்தி நடத்தப்படுவது கண்டிக்கத்தக்கது என்றார் அவர்.