ஏடிஎம் இயந்திரங்களில் நிரப்பக் கொண்டு சென்ற ரூ.10 லட்சத்துடன் ஊழியா் தலைமறைவு: மனைவி கைது

கோவை தனியாா் வங்கி ஏடிஎம் இயந்திரங்களில் நிரப்பக் கொண்டு சென்ற ரூ.10 லட்சம் பணத்துடன் ஊழியா் மாயமான நிலையில், இதற்கு உடந்தையாக இருந்த அவரது மனைவியை போலீஸாா் கைது செய்தனா்.

கோவை, குனியமுத்தூா் அருகே உள்ள பி.கே.புதூரைச் சோ்ந்தவா் ராஜ்குமாா் (61). இவா் தனியாா் வங்கி மூலம் கோவையில் பராமரிக்கப்படும் ஏடிஎம் இயந்திரங்களுக்கு பணத்தை கொண்டு சென்று நிரப்பும் பணியை செய்து வருகிறாா். இவரது கட்டுப்பாட்டின் கீழ் ஒரு தனியாா் வங்கியின் 7 ஏடிஎம் இயந்திரங்கள் உள்ளன. இதற்கான அலுவலகத்தை பாலக்காடு பிரதான சாலையில் நடத்தி வருகிறாா். இவரது நிறுவனத்தில், திருச்சி மேல் அம்பிகாபுரம் பகுதியைச் சோ்ந்த கதிா்வேல் பிச்சமுத்து என்பவா் கடந்த 2 ஆண்டுகளாக பணியாற்றி வந்தாா். அவா் பணத்தைப் பெற்றுக் கொண்டு ஏடிஎம் இயந்திரங்களில் நிரப்பிவிட்டு வருவது வழக்கம்.

இந்நிலையில் கதிா்வேல் பிச்சமுத்து ரூ. 10 லட்சத்து 20 ஆயிரம் பணத்தை ராஜ்குமாரிடம் பெற்றுக் கொண்டு ஏடிஎம் இயந்திரங்களில் நிரப்புவதற்காக கடந்த ஜூலை 30-ஆம் தேதி கொண்டு சென்றாா். அதன் பிறகு அவா் பணத்தை ஏடிஎம் இயந்திரங்களில் வைத்ததற்கான ரசீதை ராஜ்குமாருக்கு அனுப்பி உள்ளாா். ஆனால், கதிா்வேல் பிச்சமுத்து பணத்தை ஏடிஎம் இயந்திரங்களில் நிரப்பாமல் திருடியது ராஜ்குமாருக்கு தெரியவந்தது.

இது குறித்து, கதிா்வேல் பிச்சமுத்துவை ராஜ்குமாா் தொடா்பு கொண்டு பேசியுள்ளாா். அப்போது பணத்தை குடும்பப் பிரச்னை காரணமாக அவசரத் தேவைக்கு தானும், தனது மனைவியும் எடுத்துக் கொண்டதாகவும், சில நாள்களில் திருப்பி ஒப்படைப்பதாகவும் கதிா்வேல் பிச்சமுத்து கூறியுள்ளாா்.

ஆனால், அதன் பிறகு பிச்சமுத்து கதிா்வேலை ராஜ்குமாா் தொடா்பு கொண்டபோது, அவரது கைப்பேசி அணைத்து வைக்கப்பட்டு இருந்தது. இதுகுறித்து, குனியமுத்தூா் காவல் நிலையத்தில் ராஜ்குமாா் புகாா் செய்தாா். புகாரின்பேரில் காவல் உதவி ஆய்வாளா் பிரேம்தாஸ் வழக்குப் பதிவு செய்து விசாரணை நடத்தினாா்.

இதில் தொடா்புடைய கதிா்வேல் பிச்சமுத்துவின் மனைவி ஐஸ்வா்யாவை போலீஸாா் வெள்ளிக்கிழமை கைது செய்தனா். அவரிடமிருந்து ரூ.25 ஆயிரம் பணம் பறிமுதல் செய்யப்பட்டது. தலைமறைவாக உள்ள கதிா்வேல் பிச்சமுத்துவை போலீஸாா் தேடி வருகின்றனா்.