சந்தூர் மாங்கனிமலை முருகன் கோயிலில்ஆடிக் கிருத்திகை விழா கொடியேற்றம்

சந்தூர் மாங்கனி மலை முருகன் கோயிலில் 49-ஆம் ஆண்டு ஆடிக் கிருத்திகை விழா கொடியேற்றத்துடன் தொடங்கியது.
போச்சம்பள்ளியை அடுத்த சந்தூர் கிராமத்தில் உள்ள மாங்கனி மலையில் ஸ்ரீ வேல்முருகன் வள்ளி தெய்வசேனா சமேத திருக்கோயில் உள்ளது.
இந்தக் கோயிலில் 49-ஆம் ஆண்டு ஆடிக் கிருத்திகை விழா புதன்கிழமை கொடியேற்றத்துடன் தொடங்கியது. முன்னதாக சுவாமிக்கு சிறப்பு பூஜைகள் செய்யப்பட்டன.
2-ஆம் தேதி காலை சிறப்பு பூஜை, அபிஷேகம் மற்றும் சந்தனக் காப்பு நிகழ்ச்சிகள் நடைபெறுகின்றன. 3-ஆம் தேதி சுவாமிக்கு சிறப்பு அபிஷேக அலங்காரம் மற்றும் விஷேச பூஜைகள் நடைபெறுகின்றன. 4-ஆம் தேதி சனிக்கிழமை காலை புஷ்ப அலங்காரம், பரணி சாத்துபடி, இரவு 7 மணிக்கு மாங்கனிமலை ஸ்ரீ வேல்முருகன் பூப்பல்லக்கில் அலங்கரிக்கப்பட்டு நகர்வலம் வருதல், மாக்கிரெட்டிக் கொட்டாய் சரவணா குழுவினரால் சிலம்பாட்டம், காவடி ஆட்டம் மற்றும் கிருஷ்ணன் பாண்டுரங்கன் மற்றும் ஒப்பதவாடி பிரபு குழுவினரால் கரகாட்டம், நையாண்டி மேளம், பம்பை வாத்தியம் உள்ளிட்ட நிகழ்ச்சிகள் நடைபெறுகின்றன. விழாவின் முக்கிய நாளான 5-ஆம் தேதி காலை மாரியம்மன் கோயில் முன்பு வீரபத்திரசுவாமி பக்தர்களின் சேவ ஆட்ட நிகழ்ச்சியும், பக்தர்களின் தலை மீது தேங்காய் உடைக்கும் நிகழ்ச்சி நடைபெறுகின்றன.
இதைத் தொடர்ந்து காலை 10 மணியளவில் சலாக்கு போடுதல், காவடி எடுத்தல் நிகழ்ச்சி நடைபெறுகிறது.
பிற்பகல் 2 மணியளவில் சந்தூர் கார்த்திக் என்பவர் சிடல் ஆடும் நிகழ்ச்சி நடைபெறுகிறது. வரும் 6 -ஆம் தேதி சுவாமிக்கு திருக்கல்யாணம் நிகழ்ச்சியுடன் விழா நிறைவு பெறுகிறது. ஏற்பாடுகளை சந்தூர் ஊர் பொதுமக்களும், கோயில் நிர்வாகத்தினர் செய்து உள்ளனர்.