அழகுமுத்து முனியப்பன் கோயில் திருவிழா

சட்டையம்புதூர் அழகுமுத்து முனியப்பன் கோயில் ஆடித் திருவிழா புதன்கிழமை
நடைபெற்றது.
பிரசித்தி பெற்ற அழகுமுத்து முனியப்பன் கோயிலில் ஆண்டுதோறும் ஆடி மாத திருவிழா கொண்டாடப்பட்டு வருகிறது. திருவிழாவில் முனியப்பன் சுவாமிக்கு சிறப்பு அலங்காரம் செய்யப்பட்டு சிறப்பு பூஜைகள் நடத்தப்பட்டன. பக்தர்கள் மொட்டை அடித்தும், பெண்கள் பூமுடி எடுத்தும் காணிக்கை செய்தனர். வேண்டுதல்களாக பக்தர்கள் மண் உருவச் சிலைகளை ஊர்வலமாக எடுத்து வந்து சுவாமியின் காலடியில் வைத்து வழிபாடு செய்தனர். மேலும், விரதமிருந்து வேல் காணிக்கை சாற்றி வேண்டுதல் நிறைவேற்றினர். இதில் ஏராளமான பெண்கள் பொங்கல் வைத்து பூஜை செய்தனர்.