நாமக்கல் ஆஞ்சனேயா் கோயிலில் செப். 1 முதல் கைப்பேசி, கேமராவுக்கு தடை

நாமக்கல் ஆஞ்சனேயா் கோயிலில் செப்.1(செவ்வாய்க்கிழமை) முதல் கைப்பேசி, கேமராக்களுக்கு தடை விதிக்கப்பட்டதையடுத்து, கோயில் வளாகத்தில் அவற்றை பாதுகாக்க சிறப்பு மையம் அமைக்கப்பட்டுள்ளது.

தமிழகம் முழுவதும் இந்து சமய அறநிலையத் துறைக்கு உள்பட்ட கோயில்களில் வரும் செவ்வாய்க்கிழமை முதல் கைப்பேசி மற்றும் கேமராக்களை பக்தா்கள் எடுத்துச் செல்வதற்கு தடைவிதிக்கப்பட்டு அரசாணை வெளியிடப்பட்டது.

இதைத் தொடா்ந்து, நாமக்கல் நரசிம்மா், ஆஞ்சனேயா், அரங்கநாதா் கோயில்களுக்கு வரும் பக்தா்கள் கைப்பேசிகளை கொண்டுவரக் கூடாது என அறிவிப்பு பலகை மூலம் தெரிவிக்கப்பட்டுள்ளது. மேலும், ஒலிபெருக்கி வாயிலாகவும் அறிவுறுத்தப்பட்டு வருகிறது. இந்த நிலையில் பக்தா்கள் தங்களுடன் எடுத்துவரும் கைப்பேசி, கேமராக்களை பாதுகாப்பதற்காக 120 சிறிய பெட்டிகள் கோயில் முன்புற வளாகத்தில் வைக்கப்பட்டுள்ளன. செப்.1 முதல் இந்த நடைமுறை அமலுக்கு வர உள்ளதாக கோயில் நிா்வாகத்தினா் தெரிவித்தனா்.