பேளூர் ராமநாதபுரம் மாரியம்மன் கோயில் கும்பாபிஷேக விழா

வாழப்பாடி  அருகே பேளூர் ராமநாதபுரம் சக்தி மாரியம்மன், மதுரை வீரன், காத்தவராயன் கோயில் கும்பாபிஷேக விழா புதன்கிழமை நடைபெற்றது. 
பேளூர் பேரூராட்சிக்குள்பட்ட ராமநாதபுரம் கிராமத்தில், ராஜகோபுரம், குறிஞ்சி கோபுரம், மகாமண்டபம் சகிதமாக சக்தி மாரியம்மன் கோயில் அமைக்கப்பட்டுள்ளது. இக்கோயில் கும்பாபிஷேக விழா புதன்கிழமை நடைபெற்றது.  அதிகாலை 5 மணியளவில் ஐந்தாம் கால யாக பூஜை, தீபாராதனை,  காலை 7.30 மணியளவில் சிவாச்சாரியர்கள் முன்னிலையில், கோபுரக் கலசம் மற்றும் பரிவார தேவதைகளுக்கு புனித நீர் ஊற்றி மகா கும்பாபிஷேகம் நடைபெற்றது. 
இதனைத் தொடர்ந்து, கோயில் வளாகத்திலுள்ள மதுரை வீரன், காத்தவராயன் மற்றும் பரிவார தெய்வங்களுக்கு புனித நீர் தெளிக்கப்பட்டு கும்பாபிஷேக விழா, சிறப்பு பூஜை  நடைபெற்றது. விழாவில் பங்கேற்ற பக்தர்களுக்கு அன்னதானம் வழங்கப்பட்டது.