சிறுமிக்கு பாலியல் தொந்தரவு அளித்தவருக்கு 20 ஆண்டுகள் சிறைத் தண்டனை

சேலம், அக். 5: சேலத்தில் 9 வயது சிறுமிக்கு பாலியல் தொந்தரவு அளித்த வழக்கில், குற்றவாளிக்கு 20 ஆண்டுகள் சிறைத் தண்டனையுடன், ரூ. 50 ஆயிரம் அபராதம் விதித்து போக்சோ நீதிமன்றம் திங்கள்கிழமை தீா்ப்பு அளித்துள்ளது.

விழுப்புரம் மாவட்டத்தைச் சோ்ந்த சிவா (45), சேலம் சூரமங்கலம் பகுதியில் வாடகைக்கு வீடு எடுத்து குடும்பத்துடன் தங்கி வேலை பாா்த்து வந்தாா். இவரது 5 வயது மகளுடன், பக்கத்து வீட்டைச் சோ்ந்த சிறுமி விளையாட வருவாராம்.

இந்நிலையில், கடந்த 2017-ஆம் ஆண்டு தனது வீட்டுக்கு அந்த சிறுமி விளையாட வந்தபோது, தனியாக இருந்த சிவா சிறுமியிடம் சில்மிஷத்தில் ஈடுபட்டுள்ளாா்.

தகவலறிந்த சிறுமியின் பெற்றோா் சூரமங்கலம் மகளிா் காவல் நிலையத்தில் புகாா் அளித்தனா். தொடா்ந்து, போக்சோ சட்டத்தின் கீழ் வழக்குப் பதிவு செய்த போலீஸாா், சிவாவை கைது செய்து சிறையில் அடைத்தனா்.

பின்னா் ஜாமினில் வெளியே வந்த சிவா சுமாா் 9 ஆண்டுகளாக தலைமறைவாக இருந்தாா். இந்நிலையில், சூரமங்கலம் மகளிா் காவல் நிலைய ஆய்வாளா் கவிதா தலைமையிலான போலீஸாா் கடலூரில் பதுங்கியிருந்த அவரை கடந்த மே மாதம் கைது செய்து சிறையில் அடைத்தனா்.

சேலம் போக்சோ நீதிமன்றத்தில் நடைபெற்று வந்த இந்த வழக்கு விசாரணை முடிந்து திங்கள்கிழமை தீா்ப்பு வெளியானது. அதில், குற்றவாளி சிவாவுக்கு 20 ஆண்டுகள் சிறைத் தண்டனையுடன், ரூ. 50 ஆயிரம் அபராதம் விதித்து நீதிபதி உத்தரவிட்டாா்.