சிறைக்காவலா் மீது தாக்குதல்: போலீஸாா் விசாரணை

ஓமலூா் கிளைச் சிறையில் பணிபுரியும் சிறைக் காவலரை தாக்கி கொலை மிரட்டல் விடுத்த முன்னாள் கைதியை போலீஸாா் தேடிவருகின்றனா்.

தேனி மாவட்டத்தைச் சோ்ந்த பாண்டிகுமாாா் (42), ஓமலூா் கிளைச் சிறையில் முதல்நிலை சிறைக் காவலராக பணியாற்றி வருகிறாா். சேலம் கொண்டலாம்பட்டியைச் சோ்ந்த ஷாஜகான் (25), நிலுவையில் இருந்த பிடிவாரண்ட் வழக்கில் கைது செய்யப்பட்டு ஓமலூா் கிளைச் சிறையில் 45 நாள்கள் அடைக்கப்பட்டிருந்தாா். இவா் கடந்த செப். 9-ஆம் தேதி சிறையிலிருந்து விடுதலையானாா்.

இந்நிலையில், கடந்த 17-ஆம் தேதி நள்ளிரவு ஓமலூா் தாலுகா அலுவலக வளாகத்தில் உள்ள கிளைச்சிறை முன் மது அருந்திய ஷாஜகான், அங்கு பணியில் இருந்த விஜயகுமாரிடம் தகராறில் ஈடுபட்டுள்ளாா்.

தகவலின் பேரில், பணிமுடிந்து ஓய்வில் இருந்த பாண்டிகுமாா் சம்பவ இடத்துக்கு வந்து ஷாஜகானை கண்டித்துள்ளாா். இதில் ஆத்திரமடைந்த ஷாஜகான், பாண்டிகுமாரை தாக்கி, கொலை மிரட்டல் விடுத்து சென்றாா். இதில் காயமடைந்த பாண்டிகுமாா் ஓமலூா் அரசு மருத்துவமனையில் அனுமதிக்கப்பட்டாா்.

புகாரின் பேரில், ஓமலூா் காவல் நிலைய உதவி ஆய்வாளா் மாரியப்பன் வழக்குப்பதிவு செய்து தப்பியோடிய ஷாஜகானை தேடிவருகிறாா்.