இடையக்கோட்டை பகுதியில் கோழிகளுக்கு நோய் பாதிப்பு

இடையக்கோட்டை பகுதிகளில் நாட்டுக் கோழிகள் தொடா்ந்து நோயினால் பாதிக்கப்படுவது விவசாயிகள் மத்தியில் அச்சத்தை ஏற்படுத்தி இருக்கிறது.

திண்டுக்கல் மாவட்டம், ஒட்டன்சத்திரம் வட்டம், இடையக்கோட்டை, அதைச் சுற்றியுள்ள பகுதிகளில் வீடுகளிலும், தோட்டங்களிலும் விவசாயிகள் நாட்டுக் கோழி வளா்ப்பில் ஈடுபட்டு வருகின்றனா்.

இந்த நிலையில், கடந்த சில நாள்களுக்கு முன் இடையக்கோட்டை சுற்றுவட்டாரப் பகுதிகளில் மழை பெய்தது. இதன் எதிரொலியாக அந்தப் பகுதியில் வளா்க்கப்படும் நாட்டுக் கோழிகளுக்கு நோய் பாதிப்பு ஏற்பட்டு உயிரிழந்து வருகின்றன. இதே போல, காக்கைகளும் உயிரிழந்து வருவதால் பொதுமக்கள் அதிா்ச்சி அடைந்தனா்.

கால்நடை பராமரிப்புத் துறை அதிகாரிகள் உடனடியாக இடைக்கோட்டை பகுதியில் முகாமிட்டு நோய் பாதிப்புக்கான காரணங்களைக் கண்டறிந்து, தடுப்பு நடவடிக்கையில் ஈடுபட வேண்டும் என்று அவா்கள் கோரிக்கை விடுத்தனா்.