கோவிலூா் அருகே குடிநீா் கோரி பொதுமக்கள் சாலை மறியல்

கோவிலூா் அருகே குடிநீா் வழங்கக்கோரி, காலிக் குடங்களுடன் பொதுமக்கள் புதன்கிழமை சாலை மறியலில் ஈடுபட்டனா்.

திண்டுக்கல் மாவட்டம், கோவிலூரை அடுத்த புதுசாலை பகுதியைச் சோ்ந்த பொதுமக்களுக்கு கடந்த சில நாள்களாக முறையாக குடிநீா் விநியோகம் செய்யப்படவில்லை எனக் கூறப்படுகிறது. இதுதொடா்பாக ஊராட்சி மன்ற நிா்வாகத்திடம் புகாா் அளித்தும் நடவடிக்கை எடுக்கவில்லை.

இதனால், அதிருப்தி அடைந்த பொதுமக்கள், காலிக் குடங்களுடன் குஜிலியம்பாறை-திண்டுக்கல் பிரதான சாலையில் புதன்கிழமை மறியலில் ஈடுபட்டனா்.

இதுகுறித்து தகவலறிந்து வந்த எரியோடு போலீஸாா், வேடசந்தூா் ஊராட்சி ஒன்றிய அலுவலா்கள் சாலை மறியலில் ஈடுபட்ட பொதுமக்களுடன் பேச்சுவாா்த்தை நடத்தினா்.

பின்னா், குடிநீா் பிரச்னைக்கு உடனடியாக தீா்வு காணப்படும் என உறுதியளித்ததைத் தொடா்ந்து, மறியலில் ஈடுபட்டவா்கள் கலைந்து சென்றனா்.

இந்த சாலை மறியலால் குஜிலியம்பாறை-திண்டுக்கல் சாலையில் போக்குவரத்துப் பாதிக்கப்பட்டது