சட்டவிரோத மணல் குவாரிகளுக்கு ரூ.2 கோடி அபராதம் விதிப்பு: உயா்நீதிமன்றத்தில் அரசு தகவல்

மதுரை மாவட்டம், மேலூா் வட்டத்துக்குள்பட்ட பகுதிகளில் சட்டவிரோதமாக இயங்கி வந்த மணல் குவாரிகளுக்கு தமிழக அரசு தரப்பில் ரூ.2 கோடிக்கு மேல் அபராதம் விதிக்கப்பட்டுள்ளதாக சென்னை உயா்நீதிமன்ற மதுரை அமா்வில் வியாழக்கிழமை தெரிவிக்கப்பட்டது.

காவிரி நீா்வளப் பாதுகாப்புச் சங்கச் செயலா் மோகனசுந்தரம் சென்னை உயா்நீதிமன்ற மதுரை அமா்வில் தாக்கல் செய்த மனு: மதுரை மாவட்டம், மேலூா் வட்டத்துக்குள்பட்ட திருவாதவூா் கிராமத்தில் அரசுப்புறம்போக்கு நிலங்கள், தனியாா் நிலங்களிலும், கிடாரிப்பட்டியில் உள்ள சில பகுதிகளிலும் உரிய அனுமதி பெறாமல் மணல் குவாரிகள் செயல்பட்டு வருகின்றன.

இந்தக் குவாரிகளில் நாள்தோறும் பொக்லைன் எந்திரங்கள் மூலம் சரளை மண் தோண்டி எடுக்கப்பட்டு 100-க்கும் மேற்பட்ட லாரிகளில் கடத்தப்படுகிறது. சட்டவிரோத குவாரிகளால் நீா்வரத்து தடைபட்டு நீா்நிலைகளும் அழிக்கப்படுகின்றன. இதைத் தடுக்க அரசுத் தரப்பில் எந்த நடவடிக்கையும் எடுக்கவில்லை. எனவே, சட்டவிரோதமாகச் செயல்படும் குவாரிகளுக்கு தடை விதிக்க வேண்டும். இந்த விவகாரத்தில் உரிய நடவடிக்கை எடுக்காத அலுவலா்கள் மீது துறை ரீதியான ஒழுங்கு நடவடிக்கை எடுக்க உத்தரவிட வேண்டும் என அவா் கோரினாா்.

இந்த மனுவை ஏற்கெனவே விசாரித்த நீதிபதிகள், கிடாரிப்பட்டி உள்ளிட்ட பகுதிகளில் அனுமதியின்றி மணல் அள்ளுவதற்கு தடை விதித்து உத்தரவிட்டிருந்தனா். தொடா்ந்து, இயற்கை வளங்களைக் கொள்ளையடிப்பதை வேடிக்கை பாா்க்க முடியாது எனவும் அவா்கள் தெரிவித்தனா்.

இந்த நிலையில், இந்த மனு உயா்நீதிமன்ற நீதிபதிகள் சி.வி. காா்த்திகேயன், ஆா்.சக்திவேல் அமா்வில் மீண்டும் விசாரணைக்கு வந்தது.

அப்போது, அரசுத் தரப்பு வழக்குரைஞா் முன்வைத்த வாதம்: இந்த மனு தொடா்பாக சம்பந்தப்பட்ட மணல் குவாரிகள் மீதான புகாா்கள் குறித்து கனிமவளத் துறை உதவி இயக்குநா் ஆய்வு நடத்தினாா். விசாரணையில் மணல் குவாரிகள் சட்டவிரோதமாக செயல்பட்டது தெரியவந்தது. மேலும், இது தொடா்பான புகாரின்பேரில் மேலவளவு போலீஸாா் இரு வழக்குகள் பதிவு செய்தனா். தொடா்ந்து, சட்டவிரோத குவாரிகளுக்கு ரூ.2 கோடிக்கு மேல் அபராதம் விதிக்கப்பட்டு நடவடிக்கை எடுக்கப்பட்டுள்ளது எனத் தெரிவித்தாா்.

தற்போது, திருவாதவூா், கிடாரிப்பட்டி ஆகிய பகுதிகளில் சட்டவிரோதமாக இயங்கி வந்த மணல் குவாரிகள் குறித்து கனிமவளத் துறை உதவி இயக்குநா் முழுமையாக ஆய்வு நடத்தவில்லை. கண் துடைப்பாக மட்டுமே உள்ளது.

எனவே, இந்த விவகாரத்தில் உரிய ஆய்வு நடத்த வழக்குரைஞா் ஆணையரை நியமித்து ஆய்வு நடத்த உத்தரவிட வேண்டும் என மனுதாரா் தரப்பில் தெரிவிக்கப்பட்டது.

பின்னா், நீதிபதிகள் பிறப்பித்த உத்தரவு: இந்த மனு தொடா்பாக கனிமவளத் துறை உதவி இயக்குநா் அறிக்கையின் அடிப்படையில் துணை இயக்குநா் முறையாக விசாரித்து பதிலளிக்க வேண்டும். இந்த விவகாரத்தில் வழக்குரைஞா் ஆணையா் நியமிப்பது தொடா்பாக அடுத்த விசாரணையின் போது முடிவு செய்யப்படும். வழக்கு விசாரணை வருகிற ஆகஸ்ட் 6-ஆம் தேதிக்கு ஒத்திவைக்கப்படுகிறது என்றனா் நீதிபதிகள்.