ஈரான் சிறையிலிருந்து விடுதலையான  மீனவர்களுக்கு நிதி உதவி

ஈரான் சிறையிலிருந்து விடுதலையான ராமநாதபுரம் மாவட்டத்தைச் சேர்ந்த மீனவர்கள் 11 பேருக்கும், தலா ரூ.5 லட்சத்துக்கான காசோலை வெள்ளிக்கிழமை வழங்கப்பட்டது.

 ராமநாதபுரம் மாவட்ட ஆட்சியர் அலுவலக கூட்ட அரங்கில் நடைபெற்ற இந்நிகழ்ச்சிக்கு ஆட்சியர் எஸ்.நடராஜன் தலைமை வகித்தார். மாவட்ட வருவாய் அதிகாரி மு.அலிஅக்பர், முதுகுளத்தூர் எம்.எல்.ஏ. முருகன், முதுகுளத்தூர் நிலவள வங்கித் தலைவர் ஆர்.தர்மர் ஆகியோர் முன்னிலை வகித்தனர். தமிழக மீன்வளத்துறை அமைச்சர் கே.ஏ.ஜெயபால், தமிழக விளையாட்டு மற்றும் இளைஞர் நலத்துறை அமைச்சர் எஸ்.சுந்தரராஜ் ஆகியோர் 11 பேருக்கும் உதவித் தொகையை காசோலைகளாக வழங்கினர். இந்நிகழ்ச்சியில் மீன்வளத்துறை துணை இயக்குநர் காசிநாதபாண்டியன் உள்ளிட்ட பலர் கலந்து கொண்டனர்.