கம்பத்தில் தடையை மீறி ஊர்வலம்: மார்க்சிஸ்ட் கட்சியினர் 26 பேர் கைது

தேனி மாவட்டம், கம்பத்தில் வியாழக்கிழமை தடையை மீறி ஊர்வலமாக சென்று ஆர்பாட்டம் செய்ய முயன்ற மார்க்சிஸ்ட் கம்யூனிஸ்ட் கட்சியைச் சேர்ந்த மூன்று பெண்கள் உட்பட 26 பேரை போலீஸார் கைது செய்தனர். 
சென்னை-சேலம் 8 வழிச்சாலை திட்டத்தை கைவிடக்கோரி திருவண்ணாமலையில் நடைபயணம் சென்ற மார்க்சிஸ்ட் கம்யூனிஸ்ட் கட்சி மாநிலச் செயலாளர் கே.பாலகிருஷ்ணனை புதன்கிழமை போலீஸார் கைது செய்தனர். இதனைக் கண்டித்து தேனி மாவட்டம் கம்பத்தில் வியாழக்கிழமை மாலை பகுதி செயலாளர் நாகராஜ் தலைமையில் மாவட்டக்குழு உறுப்பினர்கள் விஜயா, லெனின், ஜெயராஜ், பன்னீர்வேல்  உள்பட  26 பேர் காந்தி சிலையிலிருந்து ஊர்வலமாகச் சென்று ஏ.கே.ஜி. திடலில் ஆர்பாட்டம் செய்ய  முயன்றனர் போலீஸாரின் அனுமதியை மீறி ஊர்வலமாக செல்ல முயன்றவர்கனை துணை கண்காணிப்பாளர்  சீமைச்சாமி தலைமையிலான போலீஸார் காந்திசிலை திடலில் தடுக்க முயன்றனர். அப்போது போலீஸாருக்கும், போராட்டக்காரர்களுக்கும் இடையே தள்ளு முள்ளு ஏற்பட்டது.  
சிலர் போலீஸார் பிடியில் இருந்து தப்பி, கம்பம் குமுளி நெடுஞ்சாலையில் அமர்ந்து மறியலில் ஈடுபட  முயன்றனர். உடனே போலீஸார்  3 பெண்கள் உட்பட 26 பேரை கைது செய்தனர்.