சுருளி அருவியில் சேதமடைந்த தடுப்புக் கம்பிகள் சீரமைக்கப்படுமா?

மழை வெள்ளத்தால் சேதமடைந்த சுருளி அருவியை சீரமைக்க வேண்டும் என சுற்றுலாப் பயணிகள் கோரிக்கை விடுத்துள்ளனர்.
தேனி மாவட்டத்தில் உள்ள சுற்றுலா தலங்களில் முதன்மையான இடத்தை வகிப்பது கம்பம் அருகே உள்ள சுருளிஅருவி. இங்கு கடந்த ஆகஸ்ட் மாதம் பெய்த பலத்த மழையின் காரணமாக அருவியில் வெள்ளப் பெருக்கு ஏற்பட்டு 20 நாள்களுக்கும் மேலாக குளிக்க தடை விதிக்கப்பட்டது. 
இந்த வெள்ளப் பெருக்கின் போது, சுற்றுலாப் பயணிகள் குளிக்கும் இடத்தில் அமைக்கப்பட்டிருந்த தடுப்பு இரும்புக் கம்பிகள் அடித்துச் செல்லப்பட்டதுடன், கான்கிரீட் தரைகள் பெயர்ந்தன. அருவிக்கு செல்லும் படிக்கட்டுகள் பெயர்ந்தும், ஆண்கள், பெண்கள் குளித்து விட்டு உடைமாற்றும் அறையின் கதவுகள் உடைந்தும் கிடக்கின்றன. கதவுகள் உடைந்து கிடப்பதால், கழிப்பறையை பயன்படுத்த முடியாமல், அருவியின் வளாகத்தை சுற்றுலாப் பயணிகள் திறந்த வெளி கழிப்பிடமாக பயன்படுத்துகின்றனர். 
இதனால் சுகாதாரக் கேடு ஏற்பட்டு துர்நாற்றம் வீசுகிறது. இங்குள்ள வனப்பகுதி வழியாக சுமார் 2 கிலோ மீட்டர் தொலைவு நடந்து சென்ற பின்னர்தான், அருவிக்கு செல்ல முடியும். முதியோர், பெண்கள், மாற்றுத்திறனாளிகள் செல்ல, வனச் சரணாலயத்தினர் பேருந்து மற்றும் பேட்டரி காரை இயக்கி வருகின்றனர். 
சீசன் நேரங்களில் கூட்டம் அதிகமான இருப்பதால் சுற்றுலாப் பயணிகள், வெகு நேரமாக காத்திருந்து பேருந்தில் ஏறிச் செல்கின்றனர். மேலும் பேட்டரி கார் அடிக்கடி பழுதாவதால் அதை இயக்க முடியாமல் நிறுத்தி வைத்துள்ளனர்.
பயனற்ற பயணியர் விடுதி: கம்பம் ஊராட்சி ஒன்றியம் சார்பில் கட்டப்பட்டுள்ள பயணியர் விடுதி, முறையாக பராமரிக்கப்படாமல் பழுதடைந்துள்ளது. கழிப்பறை, குளியலறை, கட்டில்கள் மிகவும் சேதமடைந்தும், மேற்கூரைகள் மற்றும் சுவர்கள் பெயர்ந்தும், இடிந்தும் உள்ளதால் பயன்பாடின்றி கிடக்கிறது. 
இதனால் ஊராட்சி நிர்வாகத்துக்கு வருவாய் இழப்பும் ஏற்பட்டுள்ளது. எனவே சுருளி அருவிப் பகுதியை விரைந்து சீரமைக்க வேண்டும் என சுற்றுலாப் பயணிகளும், பக்தர்களும் கோரிக்கை விடுத்துள்ளனர்.
இதுபற்றி சுற்றுலாப் பயணி அ.சிவக்குமார் கூறியதாவது: வனத்துறையினர் நுழைவுக் கட்டணம் வசூலிக்கின்றனர். ஆனால் அடிப்படை வசதிகள்  செய்து தரப்பட வில்லை. 
சாலை குண்டும் குழியுமாக காட்சி அளிக்கிறது. 
சாலையோர ஆக்கிரமிப்பு கடைகளால் இடையூறு ஏற்படுகிறது. இறந்தவர்களுக்கு திதி செய்யும் போது அதிக கட்டணம் வசூலிக்கப்படுகிறது. இப்பிரச்னைகளுக்கு மேகமலை வன உயிரின சரணாலயத்தினரும், ராயப்பன்பட்டி காவல் நிலையத்தினரும் நடவடிக்கை எடுக்க வேண்டும் என்றார்.
 இதுகுறித்து மேகமலை வன உயிரின சரணாலய பகுதியின் கம்பம் கிழக்கு வனச்சரகர் துரை.தினேஷ் கூறியது: சுருளி அருவிப் பகுதியில், முதலில் சாலை,  சிறுவர் பூங்கா, சரணாலயத்தில் உள்ள சிறப்பம்சங்கள் பற்றிய விளக்க கட்டடம், வனம் மற்றும் சுற்றுச் சூழல் பற்றிய விழிப்புணர்வு கருத்தரங்குகளில் மாணவ, மாணவியர் பங்கேற்க பயிற்சி அரங்கு  அமைக்கவும், மாவட்ட நிர்வாகத்திடம் கோரிக்கை வைக்க உள்ளோம். மேலும் அருவிப் பகுதியை பராமரிக்கவும் ஏற்பாடுகள் நடைபெற்று வருகின்றன என்றார்.