போடி மீனாட்சி சுந்தரேசுவரர் கோயிலில் சங்கர நாராயணன் சிலை பிரதிஷ்டை

போடி மீனாட்சி சுந்தரேசுவரர் கோயிலில் புதன்கிழமை நடைபெற்ற ஸ்ரீசங்கரநாராயணன் சுவாமி சிலை பிரதிஷ்டை நிகழ்ச்சியில் ஏராளமான பக்தர்கள் பங்கேற்று வழிபாடு செய்தனர்.
போடி மேலச்சொக்கநாதபுரம் பேரூராட்சி வினோபாஜி காலனியில்  மீனாட்சி சுந்தரேசுவரர் கோயில் உள்ளது. இக்கோயில் வளாகத்தில்  ஸ்ரீசங்கர நாராயணன் சிலை அமைக்க ஏற்பாடு செய்யப்பட்டது. அதன்படி ஒரே கல்லில் சிவபெருமானும், திருமாலும் இணைந்த வடிவமாக சங்கரநாராயணன் சிலை பிரதிஷ்டை செய்யப்பட்டது. சிலை பிரதிஷ்டை விழாவுக்கு கோயில் தலைவர் டி.முத்துச்சாமி தலைமை வகித்தார்.  செயலாளர் எம்.போஸ், பொருளாளர் கே.குமரேசன் ஆகியோர் முன்னிலை வகித்தனர்.கோயில் அர்ச்சகர் பி.சேகர் பூஜை ஏற்பாடுகளை செய்தார். 
பிரதிஷ்டை நிகழ்ச்சியை முன்னிட்டு சங்கரநாராயணனுக்கு மஞ்சள், குங்குமம், விபூதி, பால், தயிர், தேன், பழங்கள், இளநீர், சந்தனம் உள்ளிட்ட 16 வகையான மங்களப் பொருட்களால் அபிஷேகம் செய்யப்பட்டன. பின்னர் சிறப்பு அலங்காரம் செய்யப்பட்டு மகா  தீபாராதனை நடைபெற்றது. இதில் போடி பகுதியைச் சேர்ந்த நூற்றுக்கணக்கானோர் பங்கேற்று சுவாமிக்கு பூஜை செய்து வழிபாடு நடத்தினர். தொடர்ந்து அன்னதானம் நடைபெற்றது.