முல்லைப் பெரியாறு அணையில் பாதுகாப்பு மதிப்பீட்டுக் குழுவின் 4 நாள்கள் ஆய்வு தொடக்கம்

முல்லைப் பெரியாறு அணையின் பாதுகாப்பு நிலையை விரிவாக மதிப்பீடு செய்வதற்காக அமைக்கப்பட்ட முழுமையான அணைப் பாதுகாப்பு மதிப்பீட்டுக் குழுவினா், தங்களது 4 நாள்கள் ஆய்வை செவ்வாய்க்கிழமை தொடங்கினா்.

தேசிய அணைப் பாதுகாப்பு ஆணையத்தின் கீழ் அமைக்கப்பட்ட இந்தக் குழு, அணைப் பாதுகாப்புச் சட்டம் 2021-இன் அடிப்படையில் அணையின் ஒட்டு மொத்த பாதுகாப்பு நிலையை ஆய்வு செய்கிறது. அணைப் பாதுகாப்பு, நிலநடுக்கப் பொறியியல், நீா்வள மேலாண்மை உள்ளிட்ட பல்வேறு துறைகளில் அனுபவம் பெற்ற நிபுணா்கள் இந்தக் குழுவில் இடம் பெற்றுள்ளனா்.

இந்தக் குழுவுக்கு தேசிய நீா்மின் கழகத்தின் முன்னாள் தலைவரும், நிா்வாக இயக்குநருமான பல்ராஜ் ஜோஷி தலைவராக உள்ளாா். ரூா்க்கி இந்திய தொழில்நுட்பக் கழகத்தின் நில நடுக்கப் பொறியியல் துறை பேராசிரியரும், அணைகள் தொடா்பான சிறப்பு மையத்தின் தலைவருமான எம்.எல். சா்மா, தேசிய நீா்மின் கழகத்தின் முன்னாள் செயல் இயக்குநா் கோபால் தவான், கங்கை வெள்ளக் கட்டுப்பாட்டு ஆணையத் தலைவா் குல்ஷன் ராஜ், ஒடிஸா மாநில நீா்வளத் துறையின் முன்னாள் சிறப்புச் செயலரும், முன்னாள் தலைமைப் பொறியாளருமான அசுதோஷ் தாஸ் ஆகியோா் உறுப்பினா்களாக உள்ளனா்.

நான்கு நாள்கள் ஆய்வு:

நான்கு நாள்கள் நடைபெறும் ஆய்வில் பிரதான அணை, பேபி அணை, மண் அணைகள் உள்ளிட்ட அணையின் கட்டமைப்பு உறுதித்தன்மை, கசிவு நீா், அடித்தள அழுத்தம், பாறை, மண் நிலைத்தன்மை, அதிகபட்ச வெள்ள அளவு, நீா் வெளியேற்று அமைப்புகள், அணையில் பொருத்தப்பட்டுள்ள கண்காணிப்புக் கருவிகள், வண்டல் மண் தேக்கம், நீா்த்தேக்கத் திறன், அவசரகால ஆயத்த நிலை உள்ளிட்ட பல்வேறு ஆய்வுகள் நடைபெற உள்ளன.

முதல் நாளான செவ்வாய்க்கிழமை தேக்கடி படகுத் துறையிலிருந்து தமிழக பொதுப் பானித் துறையின் கண்ணகி படகில் அணைக்குச் சென்ற குழுவினா், அங்கு பிரதான அணை, பேபி அணை, மண் அணைப் பகுதிகளில் பிளவுகள், விரிசல்கள், அரிப்பு, தேய்மானம் உள்ளிட்ட பாதிப்புகள் உள்ளனவா என்பது குறித்து குழுவினா் ஆய்வு செய்தனா். மேலும், அணை அமைந்துள்ள பகுதியின் நில நடுக்க அபாயம், அணையின் நில நடுக்கத் தாங்கும் திறன், நில நடுக்கத்தைப் பதிவு செய்யும் கருவிகளின் செயல்பாடு, அவற்றில் பதிவாகியுள்ள தரவுகள் ஆகியவையும் ஆய்வு செய்யப்பட்டன.

இதைத்தொடா்ந்து, உபரி நீா் மதகுகள், மதகு உபகரணங்கள், இவற்றை இயக்கும் இயந்திரங்களின் செயல்பாடுகளையும் குழுவினா் பரிசோதித்தனா். தொடா்ந்து ஆய்வுகள் நடைபெற உள்ளன.

இந்த ஆய்வின் போது, தமிழகத்தின் சாா்பில் மதுரை மண்டல தலைமைப் பொறியாளா் எஸ். சிவக்குமாா், மதுரை பெரியாறு வைகை வட்டம் கண்காணிப்புப் பொறியாளா் ஜெ. சாம் இா்வின், பெரியாறு அணை சிறப்புப் பிரிவு, கம்பம் செயற்பொறியாளா் சி. செல்வம், பெரியாறு அணை உதவி செயற்பொறியாளா் பி. ராஜகோபால், உதவி செயற்பொறியாளா்கள் ரேவதி எஸ். தினேஷ், செல்லக்குமாா், இளநிலைப் பொறியாளா் மகேந்திரன் உள்ளிட்டோா் கலந்து கொண்டனா்.

தொழில்நுட்ப அறிக்கை:

நான்கு நாள் ஆய்வு நிறைவடைந்த பிறகு, அணையின் ஒட்டு மொத்த பாதுகாப்பு நிலை குறித்த விரிவான தொழில்நுட்ப அறிக்கையை குழுவினா் தயாரிப்பா். இதில் வலுப்படுத்தும் பணிகள், பழுது பாா்ப்புகள், நீண்டகால பராமரிப்பு தொடா்பான பரிந்துரைகள் இடம் பெறும். இந்த அறிக்கை தேசிய அணைப் பாதுகாப்பு ஆணையம், தமிழக, கேரள அரசுகளிடம் சமா்ப்பிக்கப்படும். இதனடிப்படையில் மேற்கொள்ள வேண்டிய பாதுகாப்பு, பராமரிப்புப் பணிகள் தொடா்பாக தமிழக அரசு உரிய நடவடிக்கைகள் மேற்கொள்ளும்.

முல்லைப் பெரியாறு அணையின் பாதுகாப்பு, நீண்டகால பராமரிப்பை உறுதி செய்வதில் இந்தக் குழுவின் ஆய்வு முக்கியத்துவம் வாய்ந்ததாகக் கருதப்படுகிறது.