புலியூரான் கிராமத்தில் பாலம் சேதம் கோயில் திருவிழாவுக்குள் சீரமைக்கப்படுமா?

அருப்புக்கோட்டை வட்டம், புலியூரான் கிராமத்தில் திருவிழாவின்போது அம்பாள் வீதி உலா  வரும் தெருவும் அதில் உள்ள பாலமும் சேதமடைந்துள்ளதால் அவற்றை சீரமைத்துத் தர பொதுமக்கள் கோரிக்கை விடுத்துள்ளனர்.
புலியூரான் கிராமத்தில் உள்ள வடக்கு வாசல் செல்வியம்மன் கோவிலில் ஆண்டுதோறும் புரட்டாசி திருவிழா நடைபெறும். விழாவின் 7 ஆம் நாளன்று சப்பரத்தில் அம்பாள் வீதி உலா நடைபெறும். இந்நிலையில் அம்பாள் வீதி உலா வரும் பகுதியிலுள்ள கிழக்கு வீதியையும் பிரதானச் சாலையையும் இணைக்கும் சிறிய பாலம் சேதமடைந்துள்ளது. கடந்த சில மாதங்களுக்கு முன் பெய்த மழையின் காரணமாக பாலத்தின் கான்கிரீட்டின் பெரும்பகுதி உடைந்துள்ளது. 
ஊரின் வடக்கே உள்ள கோயில், அதையடுத்துள்ள அரசுப் பள்ளி மற்றும் ஊரின் முக்கியப் பகுதிகளை இணைக்கும் பகுதியாக இப்பாலம் உள்ளது.  சேதமடைந்துள்ள இப் பாலத்தைக் கடக்கும் போது மாணவர்கள் அடிக்கடி விழுந்து காயம் அடைகின்றனர். 
இந்நிலையில் புரட்டாசி மாத விழாவையொட்டி அம்பாள் வீதி உலா நடைபெற உள்ளதால் இந்த பாலத்தையும்,சேதமடைந்து காணப்படும் கிழக்கு வீதியையும் விரைந்து சீரமைக்க வேண்டும் என பொதுமக்கள் கோரிக்கை விடுத்துள்ளனர்.