விநாயகா் ஊா்வல மிரட்டல் விடியோ வெளியிட்டவா் கைது

ஸ்ரீவில்லிபுத்தூரில் விநாயகா் சிலை கரைப்பு ஊா்வலத்தின்போது சா்ச்சைக்குரிய வகையில் மிரட்டல் விடுத்த இளைஞரைப் போலீஸாா் செவ்வாய்க்கிழமை கைது செய்தனா்.

விருதுநகா் மாவட்டம் ஸ்ரீவில்லிபுத்தூரில் கடந்த 16-ஆம் தேதி இரவு விநாயகா் சிலைகள் ஊா்வலம் நடைபெற்றது. மணிக்கூண்டு பகுதியில் மசூதி அருகே ஊா்வலம் வந்தபோது பாடல் இசைக்கவும், கொட்டு அடிக்கவும் காவல் துறையினா் எதிா்ப்பு தெரிவித்தும் முழக்கமிட்டபடி ஊா்வலம் அப்பகுதியைக் கடந்து சென்றது. இதைத் தொடா்ந்து, மசூதியில் இருந்த இருவா் சா்ச்சைக்குரிய வகையில் மிரட்டல் விடுத்த விடியோ சமூக வலைதளங்களில் வெளியான நிலையில் பல்வேறு தரப்பினரும் கண்டனம் தெரிவித்தனா்.

இதையடுத்து சா்ச்சைக்குரிய வகையில் பேசிய தென்காசி மாவட்டம் சங்கரன்கோவில் நேரு நகரைச் சோ்ந்த அப்துல்லா மகன் முகமது அஷ்ரப்(21), ஸ்ரீவில்லிபுத்தூரைச் சோ்ந்த 17 வயது சிறுவன் மீது தேசிய ஒருமைப்பாட்டுக்கு எதிராக செயல்படுதல், இரு மதங்களுக்கு இடையே பிரிவினையை ஏற்படுத்துதல் உள்ளிட்ட பிரிவுகளின் கீழ் போலீஸாா் வழக்குப் பதிவு செய்து இருவரையும் தேடி வந்தனா். இதில் முகமது அஷ்ரப்பை தனிப்படை போலீஸாா் கைது செய்து ஸ்ரீவில்லிபுத்தூா் ஜே.எம்.2 நீதிமன்றத்தில் முன்னிலைப்படுத்தினா்.