பள்ளி மாணவர்களுக்கு பேரிடர் மேலாண்மை பயிற்சி

காரைக்கால் பள்ளி மாணவர்களுக்கு பேரிடர் மேலாண்மை பயிற்சி புதன்கிழமை அளிக்கப்பட்டது.
காரைக்காலில் செயல்படும் காரைக்கால் அம்மையார் மேல்நிலைப் பள்ளியில், மாவட்ட நிர்வாகம் சார்பில், பேரிடர் மேலாண்மை பயிற்சி அளிக்கப்பட்டது. தீயணைப்புத் துறையினர் பங்களிப்புடன் நடந்த பயிற்சியை துணை வட்டாட்சியர் மணிகண்டன் நம்பூதிரி தொடங்கிவைத்தார்.
பேரிடர் என்பது திடீரென வரக்கூடியது. குறிப்பாக புயல், வெள்ளம், நிலஅதிர்வு போன்றவை பேரிடராகும். மேலும் மின்சாரம், எரிவாயு மூலம் ஏற்படும் விபத்துகளும் பேரிடரைக் குறிக்கும். எனவே எந்தவொரு பேரிடராக இருந்தாலும், அதை எதிர்கொள்ளும் திறனை ஒவ்வொருவரும் பெற்றிருக்கவேண்டும்.
குறிப்பாக பள்ளி, கல்லூரி மாணவ, மாணவியர் இவ்வாறான திறனை தொடக்க நிலையிலேயே பெற்றிருக்கும் வகையிலேயே காரைக்கால் மாவட்டத்தில் தொடர்ந்து இந்த பயிற்சியை அளித்து வருகிறோம். காரைக்காலில் உள்ள தீயணைப்புத் துறையினர் தேசிய பேரிடர் மீட்புக் குழுவினரிடம் பயிற்சி பெற்று வந்துள்ளனர். எனவே, தீயணைப்புத் துறையினர், இவ்வாறான சூழலில், எவ்வாறு நடந்து கொள்ள வேண்டும் என்பதை தெரிவிக்கும்போது மாணவர்கள் அதை நன்கு புரிந்துகொள்ள வேண்டும். அண்மையில், கேரளத்தில் ஏற்பட்ட வெள்ளத்தில் பேரிடர் மீட்புப் படையினர் எவ்வாறு செயல்பட்டனர் என்பதை மாணவர்கள் நினைவில்கொண்டு, அதற்கான திறனை வளர்த்துக் கொள்ள வேண்டும் என அவர் கேட்டுக்கொண்டார். தொழிற்சாலைகள் ஆய்வாளர் செந்தில்வேலன் கலந்துகொண்டு மாணவ, மாணவியரிடையே பேசினார். இந்த பயிற்சியில் 300-க்கும் மேற்பட்ட மாணவ, மாணவியரும், ஆசிரியர்களும் கலந்துகொண்டனர். தீயணைப்புத்துறையினர் பல்வேறு சாதனங்கள் மூலம் செயல்விளக்கம் அளித்தனர்.