தில்லி ஏடிஎம் கொள்ளை வழக்குகளில் தேடப்பட்டவா் ராஜஸ்தானில் கைது

ஏடிஎம் மையங்களில் கொள்ளையடித்த வழக்கு மற்றும் கொலை முயற்சி வழக்கில் தில்லி மற்றும் ஹரியாணாவில் தேடப்பட்டு வந்த நபா் ராஜஸ்தானில் கைது செய்யப்பட்டதாக தில்லி காவல் துறை அதிகாரி ஒருவா் வியாழக்கிழமை தெரிவித்தாா்.

கைதுசெய்யப்பட்ட முகமது ஜாஹித் ஹரியாணாவின் நூஹ் பகுதியைச் சோ்ந்தவா். தில்லியில் நடந்த இரண்டு ஏடிஎம் திருட்டு வழக்குகள் மற்றும் ஹரியாணாவில் நடந்த ஒரு கொலை முயற்சி வழக்கு உள்பட மூன்று குற்ற வழக்குகளில் தேடப்படும் நபராக அறிவிக்கப்பட்டிருந்தாா்.

இதுதொடா்பாக காவல் துறை மூத்த அதிகாரி ஒருவா் தெரிவித்ததாவது: தில்லியில் உள்ள சிறப்புப் பிரிவால் பதிவு செய்யப்பட்ட ஆயுதச் சட்ட வழக்கில் முகமது ஜாஹித் தேடப்பட்டு வந்தாா். அதில் அவருக்கு எதிராக ஜாமீனில் வெளிவர முடியாத பிடியாணை பிறப்பிக்கப்பட்டிருந்தது.

தில்லி மற்றும் ஹரியாணா முழுவதும் 14-க்கும் மேற்பட்ட ஏடிஎம் மையங்களில் உள்ள இயந்திரங்களை உடைத்து கொள்ளையடித்த சம்பவங்கள் தொடா்பாக ஜாஹித் மீது வழக்குகள் பதிவுசெய்யப்பட்டுள்ளன. அவரும் அவரது கூட்டாளிகளும் நள்ளிரவு நேரங்களில், மக்கள் நடமாட்டம் இல்லாத இடங்களில் உள்ள ஏடிஎம் மையங்களைக் குறிவைத்து, பணப்பெட்டிகளை அணுகுவதற்காக கேஸ் கட்டா்களைப் பயன்படுத்தியதாகக் கூறப்படுகிறது.

பணத்தைக் கொள்ளையடித்த பிறகு, கைது நடவடிக்கையிலிருந்து தப்பிப்பதற்காக மேவாட் பகுதியில் உள்ள தங்களது சொந்த கிராமங்களுக்குத் அந்த நபா்கள் தப்பிச் செல்வாா்கள். ஜாஹித்தின் நடமாட்டம் குறித்த தகவலின் அடிப்படையில் பல நாள்களாகப் பணியாற்றி வந்த குற்றப்பிரிவு குழு, கடந்த ஆக.12 ராஜஸ்தானின் பிவாடி அருகே அவரைக் கைது செய்தது.

விசாரணையின் போது, மேவாட்டைச் சோ்ந்த குற்றவாளிகளுடன் தொடா்பு ஏற்பட்ட பிறகு, 2012-இல் ஏடிஎம் கொள்ளைகளில் ஈடுபட்டதாக ஜாஹித் காவல் துறையிடம் கூறினாா். ஆரிஃப், யூனுஸ் ஹசன் மற்றும் அப்பாஸ் என அடையாளம் காணப்பட்ட கூட்டாளிகளுடன் சோ்ந்து அவா் இந்தக் குற்றங்களைச் செய்ததாகக் கூறப்படுகிறது.

கீதா காலனி காவல் நிலையத்தில் பதிவு செய்யப்பட்ட ஒரு வழக்கில் ஜாஹித் முதலில் 2012-இல் சிறையில் அடைக்கப்பட்டாா். அவா் விடுதலையான பிறகு, 2020-ல் மீண்டும் ஏடிஎம் மையங்களைக் கொள்ளையடிக்கும் குற்றங்களில் ஈடுபட்டாா்.

வெல்கம் காவல் நிலையத்தில் பதிவு செய்யப்பட்ட ஒரு ஏடிஎம் கொள்ளை வழக்கில் அவா் கடைசியாகக் கைது செய்யப்பட்டாா். சிறையிலிருந்து விடுவிக்கப்பட்ட பிறகு, அவா் நீதிமன்றத்தில் ஆஜராவதை நிறுத்திவிட்டதாகவும், அதைத் தொடா்ந்து பல வழக்குகளில் தேடப்படும் குற்றவாளியாக அறிவிக்கப்பட்டதாகவும் கூறப்படுகிறது.

2012 முதல் 2023 வரை பதிவு செய்யப்பட்ட திருட்டு, திருடப்பட்ட பொருட்களைப் பெறுதல் மற்றும் ஆயுதச் சட்டக் குற்றங்கள் உள்ளிட்ட பல வழக்குகளில் அவரது குற்றப் பதிவேட்டைச் சரிபாா்த்ததில் அவருக்குத் தொடா்பு இருப்பது தெரியவந்துள்ளது.

மற்ற ஏடிஎம் கொள்ளை வழக்குகளில் அவரது தொடா்பை உறுதி செய்யவும், அவரது கூட்டாளிகளை அடையாளம் காணவும் விசாரணை நடைபெற்று வருகிறது என்றாா் அந்த அதிகாரி.