காரில் புகையிலைப் பொருள் கடத்தியவா் கைது

பாளையங்கோட்டையில் காரில் இருந்த புகையிலைப் பொருளை பறிமுதல் செய்த போலீஸாருக்கு கொலை மிரட்டல் விடுத்தவா் கைது செய்யப்பட்டாா்.

பாளையங்கோட்டை சாந்திநகா் மணிக்கூண்டு அருகே உதவி ஆய்வாளா் முத்துப்பாண்டி தலைமையிலான போலீஸாா், கடந்த 2 ஆம் தேதி வாகனத் தணிக்கையில் ஈடுபட்டனா். அப்போது அவ்வழியாக பாளையங்கோட்டை, எம்கேபி நகரைச் சோ்ந்த அருள் இம்மானுவேல் ஸ்டீபன்(49) என்பவா் இயக்கி வந்த காரை நிறுத்தி விசாரணை மேற்கொண்டனா். பின்னா் காரை சோதனையிட்டதில் அதில் சுமாா் 225 கிராம் எடையுள்ள புகையிலைப் பொருள் இருந்துள்ளது.

போலீஸாா் அது குறித்து விசாரித்த போது, அவா் வாக்குவாதத்தில் ஈடுபட்டு காரை ஏற்றிக் கொலை செய்து விடுவேன் என போலீஸாருக்கு மிரட்டல் விடுத்தாராம். இதையடுத்து காா், புகையிலைப் பொருள் உள்ளிட்டவற்றை பறிமுதல் செய்த போலீஸாா் இது குறித்து வழக்குப்பதிவு செய்து அருள் இம்மானுவேல் ஸ்டீபனை கைது செய்தனா்.