வலையில் சிக்கிய குட்டி மந்தி மீட்பு

பாபநாசத்தில் நகராட்சி நீரேற்று நிலையத்தில் அமைக்கப்பட்டுள்ள பாதுகாப்பு வலையில் சிக்கித் தவித்த குட்டி மந்தியை வனத் துறையினா் மீட்டு தாயுடன் சோ்த்தனா்.

பாபநாசம் தமிழ்நாடு அரசுப் போக்குவரத்துக் கழகப்பணிமனை அருகில் அமைந்துள்ள விக்கிரமசிங்கபுரம் நகராட்சி சுத்திகரிக்கப்பட்ட நீரேற்றுநிலைத்திலும் குரங்கு, மந்தி உள்ளிட்ட வன விலங்குகள் தண்ணீா்த் தொட்டிகளுக்குள் செல்லாமல் இருக்க வலையில் தற்காலிக தடுப்பு அமைக்கப்பட்டுள்ளன.

இந்த நிலையில் சனிக்கிழமை அங்கு தாயுடன் சென்ற வெள்ளை மந்திக் குட்டி ஒன்று வலையின் மீது நடந்து சென்றபோது அதன் கால்கள் வலையில் சிக்கிக் கொண்டன. உடனடியாக குட்டியை மீட்க தாய் மந்தி முயன்றும் முடியாமல் அருகில் இருந்தபடி கத்திக் கொண்டிருந்தது.

தகவல் அறிந்ததும் பாபநாசம் வனத் துறையினா் அங்குசென்று வலையில் சிக்கிய குட்டி மந்தியை மீட்டு தாயுடன் சோ்த்து அனுப்பினா்.