ஓய்வூதியரிடம் ரூ.28.50 லட்சம் மோசடி: 3 போ் கைது

திருநெல்வேலியைச் சோ்ந்த ஓய்வூதியரிடம் இணையவழியில் ரூ.28.50 லட்சம் மோசடி செய்ததாக 3 பேரை போலீஸாா் திங்கள்கிழமை கைது செய்தனா்.

தச்சநல்லூா் அருகேயுள்ள சேந்திமங்கலத்தைச் சோ்ந்தவா் அனந்தப்பன் (61). தமிழ்நாடு அரசு போக்குவரத்துக் கழகத்தில் டிக்கெட் பரிசோதகராக பணியாற்றி ஓய்வுபெற்றவா். இவரது கைப்பேசி எண்ணிற்கு கடந்த 6 ஆம் தேதி மா்ம நபா் தொடா்பு கொண்டு, மும்பையில் உள்ள என்.ஐ.ஏ. காவல் துறையைச் சோ்ந்தவா் எனக் கூறி மிரட்டியுள்ளாா். அடுத்தடுத்த நாள்களில், தீவிரவாதிகளுடன் உங்களது வங்கிக் கணக்கில் இருந்து பரிவா்த்தனை நடந்துள்ளதாக கூறியதோடு, டிஜிட்டல் கைது செய்வதாக மிரட்டியுள்ளனா். பின்னா் இணையவழியில் ரூ.28 லட்சத்து 50 ஆயிரம் பெற்று ஏமாற்றியுள்ளனா்.

இதுகுறித்த புகாரின்பேரில் திருநெல்வேலி மாநகர சைபா் கிரைம் போலீஸாா் வழக்குப் பதிந்து விசாரித்தனா். மோசடியில் ஈடுபட்டது கேரள மாநிலத்தைச் சோ்ந்த 3 போ் கும்பல் என்பது தெரியவந்தது. இதையடுத்து அங்கு தனிப்படையினா் சென்று எா்ணாகுளம் மாவட்டம், நெடுவெளிகாட்டைச் சோ்ந்த ரவிக்குமாா் (52), விஸ்வபுரத்தை சோ்ந்த தினேஷ் (52), கண்ணூா் மாவட்டம், எடக்காடு பகுதியை சோ்ந்த அப்துல் சமது (50) ஆகியோரை கைது செய்தனா்.