பக்கவாட்டு சுவர் இடிந்து விழும்  நிலையில் கொள்ளிட பாலம்

அரியலூர் மாவட்டம் திருமானூர் அருகேயுள்ள கொள்ளிட பாலத்தின் பக்கவாட்டு சுவர் இடிந்து விழும் நிலையில் உள்ளதால் அதனை சீர் செய்ய நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனர்.  
திருமானூர் கொள்ளிடம் பாலம் பெரம்பலூர் - மானாமதுரை தேசிய நெடுஞ்சாலையில் அமைந்துள்ளது. சுமார் 1.30 கி.மீ தூரம் உள்ள இந்தப் பாலத்தில், பக்கவாட்டுச் சுவர் உடைந்தும் சிதிலமடைந்தும் உள்ளது. தற்போது அதிகளவு கொள்ளிடத்தில் தண்ணீர் திறந்து விடப்பட்டிருப்பதால் கரையோர மக்களிடையேயும், திருமானூர் - அரியலூர் மார்க்கமாக செல்லும் வாகன ஓட்டிகளிடையே அச்சத்தை ஏற்படுத்தியுள்ளது. 
இதுகுறித்து மக்கள் சேவை இயக்கத் தலைவர் தங்க.சண்முகசுந்தரம் கூறியது:  40 ஆண்டுகளுக்கு முன்பு கட்டப்பட்ட  இந்தப் பாலத்தின் பக்கவாட்டுச்  சுவர் சேதமடைந்தும், பாலத்தின் குறுக்கே ஆங்காங்கே விரிசல் ஏற்பட்டும் உள்ளது. ஆகையால் இந்தப் பாலத்தில் வாகனங்கள் செல்லத் தடை விதிக்க வேண்டும். 24 மணிநேரமும் தொடர் கண்காணிப்பில் பாலம் இருக்க வேண்டும் என்றார் அவர்.