வெத்தியார்வெட்டு கிராமத்தில் மக்கள் தொடர்பு முகாம்: பயனாளிகளுக்கு நலத்திட்ட உதவிகள்

அரியலூர் மாவட்டம், ஜயங்கொண்டம் அருகேயுள்ள வெத்தியார்வெட்டு கிராமத்தில் புதன்கிழமை நடைபெற்ற மக்கள் தொடர்பு முகாமில் 66 பயனாளிகளுக்கு ரூ.5 லட்சத்து 56 ஆயிரத்து 908 மதிப்பிலான நலத்திட்ட உதவிகள் வழங்கப்பட்டன.
முகாமுக்கு ஆட்சியர் மு. விஜயலட்சுமி தலைமை வகித்து, சமூக பாதுகாப்புத் திட்டத்தின் கீழ் 5 பயனாளிகளுக்கு ரூ. 60 ஆயிரத்தில் முதியோர் ஓய்வூதியத் தொகை மற்றும் இதர ஓய்வூதியத்தொகைக்கான ஆணைகளையும், வருவாய்த் துறை சார்பில் 34 பேருக்கு ரூ. 2 லட்சத்து 40 ஆயிரம் மதிப்பில் இலவச வீட்டுமனைப்பட்டா மற்றும் பட்டா மாற்ற ஆணைகளையும், வேளாண் துறை சார்பில் 10 பேருக்கு ரூ.1 லட்சத்து 66 ஆயிரத்து 908 மதிப்பில் வேளாண் உபகரணங்களும், தோட்டக்கலைத் துறை சார்பில் 6 பேருக்கு ரூ. 90 ஆயிரத்தில் கத்தரி, முந்திரி, பாகல் கன்றுகள், தர்ப்பூசணி, வெண்டைக்கான இடுபொருட்களையும், சுகாதாரத்துறை சார்பில் 14 பேருக்கு பிறப்பு மற்றும் இறப்பு சான்றிதழ் என ஆக மொத்தம் 69 பயனாளிகளுக்கு நலத்திட்ட உதவிகளை வழங்கி, இதுபோன்ற காம்களை பொதுமக்கள் பயன்படுத்திக்கொள்ள வேண்டும் என கேட்டுக் கொண்டார்.
மாவட்ட வருவாய் அலுவலர் சே. தனசேகரன், மாவட்ட ஊரக வளர்ச்சி முகமைத் திட்ட இயக்குநர் ஜி.கே. லோகேஷ்வரி, சமூகப் பாதுகாப்புத் திட்ட துணை ஆட்சியர் அ. பூங்கோதை, வேளாண் இணை இயக்குநர் உதயகுமார், கால்நடைப் பராமரிப்புத் துறை மண்டல இணை இயக்குநர் இ. முகமது ஆசிப், தோட்டக் கலைத்துறை துணை இயக்குநர் பி. அன்புராஜன், சுகாதாரப் பணிகள் துணை இயக்குநர் வீ.சி. ஹேமசந்த்காந்தி, பொது விநியோகத் திட்ட துணைப் பதிவாளர் கே.கே. செல்வராஜ் மற்றும் அனைத்துத்துறை அலுவலர்கள் கலந்துகொண்டனர். 
உடையார்பாளையம் கோட்டாட்சியர் வே.ஜோதி வரவேற்றார். ஜயங்கொண்டம் வட்டாட்சியர் குமரய்யா நன்றி தெரிவித்தார்.