விளையாட்டுப் போட்டி:  சிறப்பிடம் பெற்ற காவலருக்கு பாராட்டு

காவல்துறை மண்டல விளையாட்டுப் போட்டியில் சிறப்பிடம் பெற்ற காவலருக்கு, மாவட்டக் காவல் கண்காணிப்பாளர் டி.கே.ராஜசேகரன் புதன்கிழமை பாராட்டுத் தெரிவித்தார்.
சென்னையில் 62ஆவது காவல்துறை மண்டலங்களுக்கிடையேயான சிறந்த புகைப்படக் கலைஞர்கள் தேர்வு போட்டி அண்மையில் நடைபெற்றது. இதில் சிறந்த புகைப்படக் கலைஞர்கள் பிரிவில் கரூர் மாவட்ட காவல் துறை புகைப்படப்பிரிவில் பணியாற்றும் கலைவாணன் முதலிடம் பிடித்து தங்கப்பதக்கம் வென்றார்.
அதேபோல, திருச்சியில் நடைபெற்ற காவல் துறையினருக்கான 58வது மாநில அளவிலான தடகளப் போட்டியில் கரூர் ஆயுதப்படை காவலர் எம்.துரைராஜ் 400 மீட்டர் ஓட்டத்தில் இரண்டாமிடமும்,  200 மீட்டரில் மூன்றாமிடம் பிடித்தார். 
போட்டியில் வெற்றி பெற்ற இருவரையும் மாவட்டக் காவல் கண்காணிப்பாளர் அலுவலகத்துக்கு புதன்கிழமை வரவழைத்த மாவட்டக் காவல் கண்காணிப்பாளர் டி.கே.ராஜசேகரன் பாராட்டினார். ஆயுதப்படை துணைக் காவல் கண்காணிப்பாளர் ஏ.சிற்றரசு, மாவட்ட தனிப்பிரிவு காவல் ஆய்வாளர் ஜே.அருள்மொழி அரசு ஆகியோர் உடனிருந்தனர்.