அரசுப் பள்ளிகளில் சுற்றுச்சூழல் தின விழிப்புணர்வு நிகழ்ச்சி

பெரம்பலூர் மாவட்டத்திற்குள்பட்ட குரும்பலூர், செட்டிக்குளம் அரசுப் பள்ளிகளில் சுற்றுச்சூழல் தின விழிப்புணர்வு நிகழ்ச்சிகள் செவ்வவாய்க்கிழமை நடைபெற்றது. 
ஆலத்தூர் வட்டம், செட்டிக்குளம் அரசு மேல்நிலைப் பள்ளியில் தேசிய பசுமைப்படை சார்பில் நடைபெற்ற விழிப்புணர்வுப் பேரணியை தலைமை ஆசிரியர் பெ. நாகமணி தொடங்கி வைத்தார். மாணவ, மாணவியர் சுற்றுச்சூழல் விழிப்புணர்வு வாசகங்கள் அடங்கிய பதாதைகளை கைகளில் ஏந்தி முழக்கமிட்டு சென்றனர்.
முன்னதாக, சுற்றுச்சூழல் பாதுகாப்பு குறித்த பேச்சு, கட்டுரை, ஓவியப் போட்டி, வினாடி- வினா போட்டிகளில் வெற்றி பெற்ற மாணவ, மாணவிகளுக்கு, இந்துஸ்தான் பெட்ரோலிய கார்ப்பரேஷன் நிறுவனத்தின் திருச்சி மண்டல விற்பனை மேலாளாகள் தினேஷ், சாரங்கி ஆகியோர் பரிசுகள் வழங்கினர். தொடர்ந்து, பள்ளி வளாகத்தில் மரக்கன்றுகள் நடப்பட்டன.  நாட்டு நலப்பணித் திட்ட ஒருங்கிணைப்பாளர் ப. ராமன், சாரண, சாரணிய அமைப்பின் மாவட்ட உதவிச் செயலர் த. தனபால், ஆசிரிய, ஆசிரியைகள் பங்கேற்றனர்.  முன்னதாக, இளையோர் செஞ்சிலுவைச் சங்க மாவட்ட கன்வீனர் வெ. ராதாகிருஷ்ணன் வரவேற்றார். பசுமைப்படை ஒருங்கிணைப்பாளரும், பேரிடர் மேலாண்மை மாநில பயிற்றுநருமான தே. பாஸ்கர் நன்றி கூறினார். அதேபோல, குரும்பலூர் அரசினர் மேல்நிலைப் பள்ளியில் பிளாஸ்டிக் மாசுவை முறியடிப்போம் எனும் தலைப்பில் உலச் சுற்றுச்சூழல் தின விழா நடைபெற்றது.