பராமரிப்பின்றி பாழாகும் அம்மா பூங்கா, உடற்பயிற்சிக் கூடம்! சீரமைக்க இளைஞா்கள் கோரிக்கை!

பெரம்பலூா் மாவட்டத்தில் அம்மா பூங்காவுடன் கூடிய உடற்பயிற்சிக் கூடங்கள் போதிய பராமரிப்பின்றி பாழாகி வருவதால், அவற்றைச் சீரமைத்து மீண்டும் பயன்பாட்டுக்குக் கொண்டு வர வேண்டும் என விளையாட்டு ஆா்வலா்களும், இளைஞா்களும் கோரிக்கை விடுத்துள்ளனா்.

கிராமப்புறங்களைச் சோ்ந்த இளைஞா்களிடையே விளையாட்டில் ஆா்வத்தை ஏற்படுத்தும் வகையில் பல்வேறு திட்டங்கள் செயல்படுத்தப்பட்டு வருகிறது. விளையாட்டு வீரா்கள் பயிற்சியில் ஈடுபட கிராமங்களில் போதுமான விளையாட்டு மைதான வசதியில்லாததால் நகரங்களுக்குச் செல்ல வேண்டியுள்ளது. இதனால் பொருளாதார மற்றும் காலவிரயத்தைக் கருத்தில்கொண்டு கிராமங்களில் இளைஞா்கள், முதியோா் பயன்பெறும் வகையில், பூங்காவுடன் கூடிய உடற்பயிற்சிக் கூடம் அமைக்க வேண்டும் எனும் கோரிக்கை எழுந்தது.

இதையடுத்து, ஒவ்வொரு கிராமத்திலும் திறமையான விளையாட்டு வீரா்களை உருவாக்கும் நோக்கத்தில் பொழுதுபோக்கு, நடைப்பயிற்சி வசதியுடன் கூடிய அம்மா பூங்கா மற்றும் நவீன உடற்பயிற்சிக் கூடம் அமைக்க அரசு உத்தரவிட்டதோடு, ஊரக வளா்ச்சி முகமை மூலம் செயல்படுத்த நடவடிக்கை மேற்கொள்ளப்பட்டது. அதனடிப்படையில், கடந்த 2016 - 17 -ஆம் ஆண்டில் ஊரக வளா்ச்சி மற்றும் ஊராட்சித் துறை சாா்பில், பூங்கா ரூ. 20 லட்சத்திலும், நவீன உடற்பயிற்சிக் கூடம் ரூ. 10 லட்சத்திலும் அமைக்கப்பட்டது.

இளைஞா்களிடையே வரவேற்பு:

அதன்படி, பெரம்பலூா் மாவட்டத்தில் உள்ள 4 ஊராட்சி ஒன்றியங்களில், ஒவ்வொரு ஆண்டும் குறிப்பிட்ட ஊராட்சிகளைத் தோ்வு செய்து பூங்கா அமைக்க நடவடிக்கை மேற்கொள்ளப்பட்டது. பெரம்பலூா், ஆலத்தூா், வேப்பூா், வேப்பந்தட்டை ஆகிய ஒன்றியங்களில் தோ்வு செய்யப்பட்ட ஊராட்சிகளில் அமைக்கப்பட்ட பூங்காக்களை பொதுமக்களும், இளைஞா்களும் ஆா்வமுடன் பயன்படுத்தி வந்தனா். இந்த பூங்காவில் சுகாதார வளாகம் உள்ளிட்ட பொழுதுபோக்கு அம்சங்களும் இடம்பெற்றுள்ளன.

அதேபோல், உடற்பயிற்சிக் கூடத்தில் உடலை வலிமையாக்கும் வகையில் நவீன விளையாட்டுக் கருவிகளும் இடம் பெற்றுள்ளன. இதனால் கிராமங்களில் உள்ள இளைஞா்கள் விளையாட்டுப் பயிற்சிக்காக நகரங்களுக்குச் செல்லாமல், அவா்கள் வசிக்கும் பகுதியிலேயே பயிற்சி மேற்கொண்டனா். இந்த உடற்பயிற்சி கூடம் இளைஞா்களிடையே பெரும் வரவேற்பை பெற்றிருந்தன.

பராமரிப்பின்றி:

இந்நிலையில், கடந்த சில ஆண்டுகளாக போதிய பராமரிப்பின்றி முள்புதராய் காட்சியளிக்கிறது. நடைப்பயிற்சி தளம் முழுவதும் முள்செடிகளும், புற்களும் முளைத்து நடந்துசெல்ல இடையூறாக உள்ளது. பூங்காவில் சிறுவா்கள் விளையாட்டுக்காக அமைக்கப்பட்டிருந்த ஊஞ்சல், இருக்கைகள், சமதூக்கி விளையாட்டு, குடை ராட்டினம், சறுக்கு விளையாட்டு போன்றவைகளில் அதிகளவில் செடி, கொடிகள் வளா்ந்து வீணாகியுள்ளன. உடற்பயிற்சிக் கூடமும் பயன்படுத்தாத காரணத்தால் துருப்பிடித்து பாழடைந்துள்ளது. இதனால், பெரும்பாலான அம்மா பூங்கா மாலை நேரங்களில் சமூக விரோதிகளின் கூடாரமாக மாறிவருகிறது.

கிடப்பில் கோரிக்கை:

அம்மா பூங்காவுடன் இணைந்த நவீன உடற்பயிற்சிக் கூடம் அமைக்கப்பட்டு ஊராட்சியின் கட்டுப்பாட்டில் உள்ள நிலையில், இந்த பூங்காவை சீரமைத்து மீண்டும் பயன்பாட்டுக்கு கொண்டுவர வேண்டும் என கிராம சபைக் கூட்டத்தில் இளைஞா்களும், பொதுமக்களும் புகாா் அளித்துள்ளனா். ஆனால், ஊராட்சி நிா்வாகம் சாா்பில் எவ்வித நடவடிக்கையும் மேற்கொள்ளவில்லை என கிராமப்புற இளைஞா்கள் தெரிவித்தனா்.

இதுகுறித்து விளையாட்டு ஆா்வலா் ஆா். வேணுகோபால் கூறியது:

அம்மா பூங்காவுடன் இணைந்த உடற்பயிற்சிக் கூடம் தொடக்கத்தில் கிராம ஊராட்சிகளால் பராமரிக்கப்பட்டு வந்தது. நாளடைவில் முறையான பராமரிப்பின்றி பூங்கா முள்புதராகவும், உடற்பயிற்சிக் கூடத்தில் விளையாட்டு உபகரணங்கள் சேதமடைந்து வீணாகியுள்ளன. போதிய பராமரிப்பு இல்லாததால், அந்த விளையாட்டு திடல் திறந்தவெளி மதுக்கூடமாகவே மாறிவிட்டன. மதுபாட்டில்களும், தடைசெய்யப்பட்ட நெகிழிக் குவளைகள், கழிவுகள் சிதறிக் கிடக்கின்றன.

சீரமைப்பு தேவை:

தனியாா் உடற்பயிற்சிக் கூடத்துக்கு செல்ல வேண்டுமென்றால், ஒரே தவணையாக ஆண்டுக்கு ரூ. 8 ஆயிரம் வரை கட்டணம் செலுத்த வேண்டும். ஆனால், கிராமப்புற இளைஞா்கள் இலவசமாக இந்த உடற் பயிற்சி கூடங்களை பயன்படுத்தி வந்தனா். கிராமப்புறங்களில் உள்ள இளைஞா்களிடம் ஏராளமான திறமைகள் உள்ளன. ஆனால் கல்வி, விளையாட்டு என நகா்ப்புற இளைஞா்களுக்குக் கிடைப்பது போன்ற பயிற்சிகள் கிராமங்களில் இருக்கும் சிறாா்களுக்கும், இளைஞா்களுக்கும் கிடைப்பதில்லை. நகா்ப்புறங்களில் பல பயிற்சி மையங்கள், பயிற்சியாளா்கள் உள்ளனா்.

எனவே, கிராமப்புற இளைஞா்களுக்கு விளையாட்டு ஆா்வத்தை மேம்படுத்தும் வகையிலும், அவா்களிடையே விளையாட்டுப் போட்டிகளை ஊக்கப்படுத்தும் வகையிலும், உடல் ஆரோக்கியத்தை வலுப்படுத்தும் வகையிலும், பயனற்றுக் கிடக்கும் பூங்காவில் முள்புதா்களை அகற்றி விளையாட்டு ஆா்வலா்கள் மற்றும் நடைப்பயிற்சி மேற்கொள்வோா் பயன்பெறும் வகையில் சீரமைத்து, மீண்டும் பயன்பாட்டுக்கு கொண்டுவர மாவட்ட நிா்வாகம் உரிய நடவடிக்கை எடுக்க வேண்டும் என்றாா் அவா்.