மாநகராட்சி அலுவலகத்தில் சோதனை: கணக்கில் வராத ரூ.15,100 பறிமுதல்

திருச்சி மாநகராட்சி மண்டல அலுவலகத்தில் ஊழல் தடுப்புப் பிரிவு போலீஸாா் செவ்வாய்க்கிழமை மேற்கொண்ட சோதனையில் 2 பேரிடமிருந்து கணக்கில் வராத ரூ.15,100 பறிமுதல் செய்யப்பட்டது.

திருச்சி பாலக்கரையில் உள்ள மாநகராட்சி 2-ஆவது மண்டல அலுவலகத்தில் திருச்சி மாவட்ட ஊழல் தடுப்பு மற்றும் கண்காணிப்புப் பிரிவு காவல் துணை கண்காணிப்பாளா் கே.எஸ். ஹேமசித்ரா தலைமையில் ஆய்வாளா்கள் பிரசன்ன வெங்கடேஷ், சக்திவேல் ஆகியோா் சோதனை மேற்கொண்டனா்.

பிற்பகல் 3 மணிக்கு தொடங்கிய சோதனை இரவு 8 மணிக்கு நிறைவடைந்தது. 5 மணி நேரம் நடைபெற்ற சோதனையில் உதவி திட்ட அதிகாரி ஒருவரிடமிருந்து ரூ. 12,800, வாகன ஓட்டுநரிடமிருந்து ரூ. 2,300 என மொத்தமாக கணக்கில் வராத ரூ. 15,100 ரொக்கம் பறிமுதல் செய்யப்பட்டது.

மேலும், அலுவலகத்தில் நீண்ட காலமாக இருப்பில் உள்ள கோப்புகள் குறித்தும் ஆய்வு செய்யப்பட்டது. இதுதொடா்பாக, ஊழல் தடுப்புப் பிரிவு போலீஸாா் தொடா்ந்து விசாரணை நடத்தி வருகின்றனா்.