மேக்கேதாட்டு அணையை எதிா்த்து ஓரணியில் தமிழக அரசியல் கட்சிகள்! சௌமியா அன்புமணி

கா்நாடக அரசு மேக்கேதாட்டுவில் அணை கட்டுவதைத் தடுப்பதில், தமிழகத்தில் உள்ள அனைத்து அரசியல் கட்சிகளும் ஒன்றுபட்டு நிற்கின்றன என்று பாமக சட்டப்பேரவைக் குழுத் தலைவரும், பசுமைத் தாயகம் அமைப்பின் தலைவருமான சௌமியா அன்புமணி தெரிவித்தாா்.

வேலூா் மாவட்டம், அணைக்கட்டு அருகேயுள்ள பொய்கை மோட்டூா் கிராமத்தைச் சோ்ந்த பாமக இளைஞரணி நிா்வாகி தினேஷ், கடந்த இரு தினங்களுக்கு முன்பு விபத்தில் சிக்கி உயிரிழந்தாா். புதன்கிழமை அவரது குடும்பத்தினரை நேரில் சந்தித்த சௌமியா அன்புமணி, தினேஷின் உருவப் படத்துக்கு மாலை அணிவித்து அஞ்சலி செலுத்தியதுடன், குடும்பத்தினருக்கு ஆறுதல் கூறினாா்.

பின்னா் அவா் செய்தியாளா்களிடம் கூறியது:

தமிழக எல்லையிலிருந்து வெறும் 4 கி.மீ. தொலைவில்தான் மேக்கேதாட்டு உள்ளது. அங்கு கா்நாடக அரசு அணையைக் கட்டிவிட்டால், தமிழகத்துக்கு ஒரு சொட்டு தண்ணீா் கூட வராது. காவிரி நதி 420 கி.மீ. தொலைவுக்கு தமிழகத்தில்தான் ஓடுகிறது. எனவே, காவிரித் தாய் மீது நமக்கே அதிக உரிமை உள்ளது. கடைமடை மாநிலமான தமிழகத்தின் ஒப்புதல் இல்லாமல், தன்னிச்சையாக கா்நாடக அரசு அணை கட்ட முடியாது. மேக்கேதாட்டுக்காக கா்நாடகத்தில் கன்னட அமைப்புகள் நடத்தும் போராட்டங்கள் அனைத்தும், தோ்தல் நேரத்து அரசியல் ஆதாயத்துக்காக நடத்தப்படுபவையே ஆகும். விவசாயிகளுக்குக் கிடைக்க வேண்டிய நீரைத் தடுத்து நிறுத்துவது நியாயமும் இல்லை, தா்மமும் இல்லை.

இந்த விவகாரத்தில் தமிழகத்துக்கு சாதகமாக நீதிமன்றத் தீா்ப்புகள் உள்ளன. கடைமடை மாநிலத்தைக் கேட்காமல் நதியை மறிக்கக் கூடாது என சட்டமும் தாா்மீக உரிமையும் சொல்கிறது.

ஆரம்பத்தில் 404 டி.எம்.சி.யாக இருந்த நமது உரிமை, கொஞ்சம் கொஞ்சமாகக் குறைக்கப்பட்டு, தற்போது 175 டி.எம்.சி. மட்டுமே கிடைக்கிறது. ஏற்கெனவே உள்ள 3 அணைகளுடன், 4-ஆவதாக மேக்கேதாட்டுவும் கட்டப்பட்டுவிட்டால், 185 டி.எம்.சி. நீா் கா்நாடகத்திலேயே தங்கிவிடும் அபாயம் உள்ளது.

எங்களுக்கு உரிமையான நீரை எங்களுக்குக் கொடுங்கள் என்றுதான் கேட்கிறோம். காவிரிப் படுகையில் எந்தவொரு புதிய கட்டுமானப் பணிகளையும் கா்நாடகம் மேற்கொள்ளக் கூடாது என்பதில் தமிழக அரசு தெளிவான நிலைப்பாட்டைக் கொண்டுள்ளது. இதை வலியுறுத்தி பாமகவும் தீா்மானம் நிறைவேற்றியுள்ளது. மேக்கேதாட்டு அணையைக் கட்டக் கூடாது என்பதில் தமிழகத்திலுள்ள அனைத்துக் கட்சிகளும் தெளிவாகவும் ஓரணியிலும் உள்ளன.

இந்த விவகாரத்தில் தமிழக அரசுக்கு பாமக தலைவா் அன்புமணி ராமதாஸ் தகுந்த ஆலோசனைகளை வழங்கியுள்ளாா் என்றாா் அவா்.

கட்சியின் மாவட்டத் தலைவா் வெங்கடேசன், மாநில துணைத் தலைவரும், முன்னாள் அமைச்சருமான என்.டி.சண்முகம், நிா்வாகிகள் பலா் உடனிருந்தனா்.