நீட் கட்டணம் திருப்பியளிப்பு: வங்கிக் கணக்குகளை சமா்ப்பிக்க ஜூன் 22 வரை அவகாசம் நீட்டிப்பு

இளநிலை மருத்துவப் படிப்புக்கான தேசிய தகுதிகாண் நுழைவுத் தோ்வு (நீட்-யுஜி), 2026-க்கான கட்டணத் தொகையை திருப்பியளிக்கும் பொருட்டு, தங்களது வங்கிக் கணக்கு விவரங்களை மாணவா்கள் சமா்ப்பிப்பதற்கான காலஅவகாசத்தை தேசிய தோ்வு முகமை (என்டிஏ) ஜூன் 22-ஆம் தேதி வரை நீட்டித்துள்ளது.

வினாத்தாள் கசிந்த குற்றச்சாட்டில் மே 3-ஆம் தேதி நடைபெற்ற நீட் தோ்வு ரத்து செய்யப்பட்டது. மறுதோ்வு ஜூன் 21-ஆம் தேதி நடைபெறவுள்ளது. இந்தத் தோ்வுக்கு தனியே கட்டணம் ஏதும் வசூலிக்கப்படாது என என்டிஏ தெரிவித்திருந்தது.

இந்நிலையில், எக்ஸ் வலைதளத்தில் என்டிஏ வெளியிட்ட செய்திக் குறிப்பில், ‘நீட் பதிவு வலைதளத்தில் தங்களின் வங்கிக் கணக்கு தொடா்பான தகவல்களை மாணவா்கள் பதிவேற்றம் செய்யலாம். மொத்தம் 23 லட்சம் மாணவா்கள் மே 3-ஆம் தேதி நடைபெற்ற தோ்வை எழுதிய நிலையில் தற்போது வரை 13 லட்சம் போ் மட்டுமே வங்கிக் கணக்கு தகவல்களைச் சமா்ப்பித்துள்ளனா். மீதமுள்ள மாணவா்களும் வங்கிக் கணக்கு தகவல்களைப் பதிவேற்றம் செய்யும் நோக்கில் இதற்கான காலஅவகாசம் ஜூன் 22-ஆம் தேதி வரை நீட்டிக்கப்பட்டுள்ளது. சமா்ப்பிக்கப்பட்ட தகவல்களில் மாற்றங்கள் மேற்கொள்ள முடியாது’ எனத் தெரிவிக்கப்பட்டது.