பசுமை சாலையில் மாற்றம் என்பது ஏமாற்று வேலை: திட்டத்தை முழுமையாக கைவிடுக!

சென்னை மற்றும்  சேலம் இடையிலான 8 வழி பசுமைச்சாலைத் திட்டத்தில் மாற்றம் செய்யப்பட்டிருப்பதாகவும், அதனால் இத்திட்டத்திற்காக கையகப்படுத்தப்படும் நிலங்களின் அளவு 2125 ஏக்கர் குறையும் என்றும் இந்திய தேசிய நெடுஞ்சாலைகள் ஆணையம் அறிவித்துள்ளது. இந்த மாற்றத்தால் உழவர்களுக்கு எந்த பயனும் இல்லை. மாறாக இந்த மாற்றம் என்பதே மக்களை ஏமாற்றுவதற்கான சதித் திட்டம் தான்.

பசுமை வழிச் சாலைத் திட்டத்திற்காக இந்திய தேசிய நெடுஞ்சாலைகள் ஆணையம் தயாரித்துள்ள முன் - சாத்தியக்கூறு அறிக்கை சுற்றுச்சூழல் அனுமதிக்காக மத்திய சுற்றுச்சூழல் அமைச்சகத்திடம் தாக்கல் செய்யப்பட்டுள்ளது. அதில் 8 வழிச் சாலைத் திட்டத்தில் சில மாற்றங்கள் செய்யப்பட்டுள்ளதாக கூறப்பட்டுள்ளது. 8 வழிச் சாலையால் ஏற்படும் சமூக மற்றும் சுற்றுச்சூழல் பாதிப்புகளைக் குறைக்கும் வகையில் சாலைகளின் அகலம் 90 மீட்டரில் இருந்து 70 மீட்டராக குறைக்கப்படும்; வனப்பகுதியில் சாலை அமைக்கப்படும் தொலைவு 13.2 கிலோமீட்டரில் இருந்து 9 கி.மீ ஆக குறைக்கப்படும்; இதற்காக கையகப்படுத்தப்பட வேண்டிய நிலத்தின் பரப்பு 120 ஹெக்டேரிலிருந்து 45 ஹெக்டேராக குறையும்; ஒட்டுமொத்தமாக இத்திட்டத்திற்கு தேவைப்படும் நிலங்களின் அளவு 2791 ஹெக்டேரிலிருந்து 1941 ஹெக்டேராக குறைக்கப்படும் என்று கூறப்பட்டுள்ளது. இதற்கெல்லாம் மேலாக இத்திட்டத்திற்கான செலவு ரூ.10,000 கோடியிலிருந்து ரூ.7210 கோடியாக குறைக்கப்பட்டிருப்பதாகவும் கூறப்பட்டிருக்கிறது.

இந்த மாற்றங்கள் சாலையின் தன்மையையோ, உழவர்களுக்கு ஏற்படும் பாதிப்புகளையோ எந்த வகையிலும் குறைக்காது என்பது தான் உண்மை. இன்னும் கேட்டால் இந்த அறிவிப்பே, பசுமை வழிச் சாலை மீது மக்களுக்கு உள்ள கோபத்தை குறைப்பதற்கான நடவடிக்கை தான்.  சென்னை - சேலம் இடையே 8 வழிச் சாலை அமைக்கப்போவதாக அறிவித்திருந்த நெடுஞ்சாலைகள் ஆணையம், இப்போது முதற்கட்டமாக 6 வழிச்சாலை அமைத்து விட்டு, அடுத்தக்கட்டமாக அதை விரிவுபடுத்திக் கொள்ளலாம் என்ற முடிவுக்கு வந்துள்ளது. முதற்கட்டமாக 6 வழிச் சாலைக்கு மட்டும் நிலத்தை கையகப்படுத்தலாம்;  அதன்மூலம் மக்களின் கோபத்தை  ஓரளவாவது கட்டுப்படுத்தலாம் என்பது தான் அரசின் திட்டமாகும்.

தேசிய நெடுஞ்சாலைகள் ஆணையம் அதன் முன்- சாத்தியக்கூறு அறிக்கையிலேயே இதற்கான புள்ளி விவரங்களையும் தெரிவித்துள்ளது. 8 வழி பசுமைச்சாலைக்கான மூலத் திட்டத்தின்படி 277 கி.மீ. சாலை அமைக்க 2791 ஹெக்டேர் நிலம் தேவை என்று அறிவிக்கப்பட்டிருந்தது. இப்போது 1941 ஹெக்டேர் நிலம் போதும் என அறிவிக்கப்பட்டிருந்தது. இதில் எந்த மாயாஜாலமும் நிகழ்ந்துவிடவில்லை. 8 வழிச் சாலைத் திட்டத்தின் ஓர் அங்கமாக செங்கல்பட்டு- காஞ்சிபுரம், போளூர்-திருவண்ணாமலை, சேத்பட்- செம்மம்பாடி ஆகிய 3 இடங்களில் 50.7 கி.மீ தொலைவுக்கு இணைப்புச் சாலை அமைக்கும் திட்டம் மாநில அரசால் செயல்படுத்தப்படவுள்ளது. அதனால், அந்த பகுதிகளில் 257 ஹெக்டேர், அதாவது  642 ஏக்கரை தமிழக அரசு தனியாக கையகப்படுத்தப்படவுள்ளது. இதனால் உழவர்களுக்கு பயனில்லை.

இது தவிர 8 வழிச் சாலைத் திட்டத்தில் முதற்கட்டமாக 6 வழிச் சாலை மட்டுமே அமைக்கப்படுவதால், இத்திட்டத்திற்காக கையகப்படுத்த உத்தேசித்திருந்த 2560 ஹெக்டேரில் நான்கில் மூன்று பங்கான 1941 ஹெக்டேர் மட்டும், அதாவது 4852 ஏக்கர் நிலங்கள் மட்டும் கையகப்படுத்தப்படவுள்ளது. இம்மாற்றத்தால் கையகப்படுத்தப்படும் நிலங்களின் அளவு மட்டும் தான் கால்வாசி குறைந்துள்ளதே தவிர, நிலங்களை பறி கொடுக்கும் விவசாயிகளின் எண்ணிக்கை குறையாது. மாறாக, அவர்களின் நிலத்தில் பெரும்பகுதியை கையகப்படுத்தி விட்டு, வால் போன்ற சிறிய பகுதியை மட்டும் விட்டு வைப்பார்கள். அந்த நிலத்தை வைத்துக் கொண்டு விவசாயமும் செய்ய முடியாது; வீடு கட்டியும் வாழ்க்கை நடத்த முடியாது. அந்த நிலத்தையும் அடுத்த சில ஆண்டுகளில் சாலை விரிவாக்கம் என்ற பெயரில் கையகப்படுத்துவார்கள்.

தேசிய  நெடுஞ்சாலைகள் ஆணையம் அறிவித்திருப்பதில் பயனுள்ள ஒரே மாற்றம் கல்வராயன் மலை வழியாக சாலை அமைக்கப்படாது என்பது தான். அதைத் தவிர முந்தைய திட்டத்தில் என்னென்ன பாதிப்புகள் இருந்தனவோ, அவை அனைத்தும் இப்புதிய திட்டத்திலும் இருக்கும். முந்தைய திட்டத்துடன் ஒப்பிடும்போது இது ஒரு நயவஞ்சக திட்டமும் ஆகும். முந்தைய திட்டப்படி கையகப்படுத்தப்படவிருந்த  நிலத்தை விட இப்போது குறைந்த நிலம் கையகப்படுத்தப்படுகிறது என்பதால், குறைந்த பாதிப்பு தானே ஏற்படப்போகிறது; மீதமுள்ள நிலத்தையாவது பத்திரமாக வைத்து பிழைத்துக் கொள்ளலாமே? என்ற  எண்ணத்தில் பலரும் நிலங்களைக் கொடுக்க முன்வருவார்கள். ஆனால், அவர்களிடம் மீதமுள்ள நிலத்தையும் அடுத்த சிறிது காலத்தில் பிடுங்கி விடுவார்கள். அப்போது விவசாயிகள் அவர்களின் வாழ்வாதாரத்தை மொத்தமாக இழந்து உள்நாட்டு அகதிகளாக மாற்றப்படுவார்கள். இது பெரும் பாவம்.

இத்தகைய நாடகங்களைக் கண்டு பாட்டாளி மக்கள் கட்சியோ, உழவர்களோ ஏமாற மாட்டார்கள்.  சென்னை& சேலம் சாலைக்கு எதிரான சட்டப் போராட்டமும், அரசியல் போராட்டங்களும் தொடரும். மத்திய, மாநில அரசுகளுக்கு மக்கள் நலனில் சிறிதளவாவது அக்கறை இருந்தால் இது போன்ற நாடகங்களை நடத்துவதற்கு பதிலாக பசுமைச்சாலைத் திட்டத்தை முழுமையாக கைவிட வேண்டும்.