டெஸ்ட் கிரிக்கெட்டில் சூர்யவன்ஷி போன்ற வீரர்கள் வேண்டும்: ராகுல் டிராவிட்

டெஸ்ட் கிரிக்கெட்டில் வைபவ் சூர்யவன்ஷி போன்ற வீரர்கள் வேண்டும் என இந்திய அணியின் முன்னாள் தலைமைப் பயிற்சியாளர் ராகுல் டிராவிட் தெரிவித்துள்ளார்.

இந்திய அணியின் இளம் வீரர்களில் ஒருவரான வைபவ் சூர்யவன்ஷி நடப்பாண்டு ஐபிஎல் தொடரில் அதிரடியாக விளையாடி அனைவரது கவனத்தையும் ஈர்த்தார். மேலும், நடப்பாண்டு ஐபிஎல் தொடரில் அதிக ரன்கள் (776 ரன்கள்) குவித்த வீரர்கள் வரிசையிலும் முதலிடம் பிடித்தார்.

ஐபிஎல் தொடர் வைபவ் சூர்யவன்ஷிக்கு சிறப்பாக அமைந்த நிலையில், சர்வதேச கிரிக்கெட்டிலும் அவர் அறிமுகமானார். அவர் அறிமுகமான இரண்டாவது தொடரிலேயே தொடர் நாயகன் விருதினையும் வென்று அசத்தினார். டி20 வடிவிலான கிரிக்கெட்டில் அசத்தி வரும் வைபவ் சூர்யவன்ஷி, டெஸ்ட் கிரிக்கெட்டுக்கான இந்திய அணியிலும் இடம்பெற வேண்டும் எனப் பலரும் கூறி வருகின்றனர்.

இந்த நிலையில், டெஸ்ட் கிரிக்கெட்டில் வைபவ் சூர்யவன்ஷி போன்ற வீரர்கள் வேண்டும் என இந்திய அணியின் முன்னாள் தலைமைப் பயிற்சியாளர் ராகுல் டிராவிட் தெரிவித்துள்ளார்.

இது தொடர்பாக அவர் பேசியதாவது: ஐபிஎல் தொடரில் விளையாடி வைபவ் சூர்யவன்ஷிக்கு வெள்ளைப் பந்து போட்டிகளில் விளையாடுவதற்கான அனுபவம் நிறைய கிடைத்துள்ளது. டெஸ்ட் கிரிக்கெட் நீண்ட காலம் இருக்க வேண்டும் என்பதை நாம் விரும்புகிறோம். டெஸ்ட் கிரிக்கெட் வளர்வதையும் நாம் விரும்புகிறோம். டெஸ்ட் கிரிக்கெட்டில் வைபவ் சூர்யவன்ஷி போன்ற வீரர்கள் வேண்டும். அவரால் அனைத்து வடிவிலான போட்டிகளிலும் விளையாட முடியும் என நம்புகிறேன்.

வெள்ளைப் பந்து போட்டிகளில் விளையாடிய அளவுக்கு அவர் அதிகமாக சிவப்புப் பந்து போட்டிகளில் விளையாடியதில்லை. அவருக்கு 15 வயதுதான் ஆகிறது. அதனால், அவருக்கான நேரத்தைக் கொடுத்து நாம் பொறுமையாக காத்திருக்க வேண்டும். அவர் வெற்றிகரமாக விளையாடி வருகிறார். அவர் ஏற்ற, இறக்கங்களை சந்திக்கும்போதும் நாம் அவரிடம் பொறுமை காக்க வேண்டும்.

டெஸ்ட் கிரிக்கெட்டில் அவர் வெற்றிகரமான வீரராக உருவானால், டெஸ்ட் வடிவிலான போட்டியின் எதிர்காலமும் நன்றாக இருக்கும். வெள்ளைப் பந்து போட்டிகளில் அவர் சிறப்பாக செயல்படுவது போல, சிவப்புப் பந்து போட்டிகளிலும் இந்திய அணிக்காக அவர் நன்றாக செயல்படுவார் என நம்புகிறேன் என்றார்.