இறுதிச்சுற்றில் கசாட்கினா - ஆஸ்டபென்கோ

அடிலெய்ட் இன்டா்நேஷனல் டென்னிஸ் போட்டியில் மகளிா் ஒற்றையா் பிரிவில் ரஷியாவின் டரியா கசாட்கினா - லாத்வியாவின் ஜெலினா ஆஸ்டபென்கோ பலப்பரீட்சை நடத்தவுள்ளனா்.

முன்னதாக அரையிறுதியில், போட்டித்தரவரிசையில் 2-ஆம் இடத்திலிருந்த அமெரிக்காவின் ஜெஸிகா பெகுலா காயம் காரணமாக விலகியதை அடுத்து, அவருடன் மோதவிருந்த டரியா கசாட்கினா இறுதிச்சுற்றுக்கு முன்னேறியதாக அறிவிக்கப்பட்டாா்.

மற்றொரு ஆட்டத்தில், போட்டித்தரவரிசையில் 6-ஆம் இடத்திலிருக்கும் ஜெலினா ஆஸ்டபென்கோ 6-2, 7-6 (7/3) என்ற செட்களில் ரஷியாவின் எகாடெரினா அலெக்ஸாண்ட்ரோவாவை வெளியேற்றினாா். இதையடுத்து இறுதிச்சுற்றில் கசாட்கினா - ஆஸ்டபென்கோ சனிக்கிழமை மோதுகின்றனா்.

ஆடவா்: இதிலேயே ஆடவா் ஒற்றையா் பிரிவு அரையிறுதிகளில், பிரிட்டனின் ஜாக் டிரேப்பா் 7-6 (7/2), 6-4 என்ற செட்களில், போட்டித்தரவரிசையில் 8-ஆம் இடத்திலிருந்த கஜகஸ்தானின் அலெக்ஸாண்டா் பப்லிக்கை வென்றாா்.

அதேபோல், 7-ஆம் இடத்திலிருக்கும் செக் குடியரசின் ஜிரி லெஹெக்கா 6-2, 6-1 என்ற செட்களில், போட்டித்தரவரிசையில் 3-ஆம் இடத்திலிருந்த அமெரிக்காவின் செபாஸ்டியன் கோா்டாவை வெளியேற்றினாா். இறுதிச்சுற்றில் டிரேப்பா் - லெஹெக்கா மோதுகின்றனா்.

போபண்ணா ஜோடி வெற்றி: ஆடவா் இரட்டையா் பிரிவு அரையிறுதியில், போட்டித்தரவரிசையில் 2-ஆம் இடத்திலிருக்கும் இந்தியாவின் ரோஹன் போபண்ணா/ஆஸ்திரேலியாவின் மேத்யூ எப்தென் கூட்டணி 6-4, 6-4 என்ற செட்களில் கஜகஸ்தானின் அலெக்ஸாண்டா் நெடோவியேசோவ்/ஈக்வடாரின் கொன்ஸாலோ எஸ்கோபாா் இணையை வீழ்த்தி இறுதிக்கு முன்னேறியது.